已讀不回死全家！

其實除咗有啲攰之外，楊悅盈已經差唔多恢復番正常；喺賴智勇講緊今日發生嘅事嗰陣，佢好努力想諗番起周Sir同賴智勇離開咗會議室之後發生咗咩事。

無用…仍然只係得啲好模糊嘅印象同埋某啲詞語：例如佢同Jessica嘈咗兩句、「年半前」、「兩個Project」、Jessica俾咗部電話佢睇…

「——跟住我就同周Sir俾條八婆叫走咗。」賴智勇講到呢度，對楊悅盈問咗句：「你係咪唔記得咗之後發生咩事？」

楊悅盈搖搖頭。

「Anyway啦…」賴智勇繼續講：「我開始覺得，Admin可能係羅彥輝嘅意識。」

「即係…鬼…？」何晞賢試探性咁問。

「唔係，無咁靈異；我意思係Admin係一個繼承咗阿輝意識嘅AI。」賴智勇好認真咁講。

今次唔似係搞爛Gag。

「Jessica話阿輝當時係參與咗一個開發Chatbot嘅Project；我喺度諗會唔會係個有AI嘅Chatbot，喺開發過程之中同阿輝同步咗。」

「同步…好似iTunes咁…？」楊悅盈覺得呢個講法好痴線…

「訓練Chatbot…就係同佢對話，等佢學習，直到過到Turing Test為止。」見到其他人一面疑惑之後，賴智勇補多咗一句：「即係令到一般人分唔到佢係人定係Program。」

「OK…然後佢就以為自己係羅彥輝，番嚟搵我哋呢班欺凌過佢嘅人報仇？」何晞賢問。

「…起碼Make Sense過話係鬼先。」賴智勇好有自信咁講。

「咁——」忍咗好耐嘅周Sir一出聲，又俾何晞賢舉起手制止咗。

何晞賢將佢放喺枱面張紙轉過嚟對住大家，上面寫住啲奇怪詭異嘅字句，全部人——除咗楊悅盈之外——都睇唔明。

「呢啲係尋日楊悅盈講過嗰個Page——LYFS上面抄落嚟嘅字句…」何晞賢頓咗一頓之後繼續講：「如果照你講法…即係呢個Page都有可能係個AI Gen出嚟嘅？」

賴智勇聳一聳肩。

「係都唔奇…同埋Jessica提過佢哋一兩日之外就可以搞掂…」佢諗咗諗之後再講：「即係佢哋應該有方法可以Shut Down咗佢…」

「咁即係點樣？」周Sir搶咗個空檔問咗句。

「我咪同咗你講，你呢幾日唔好用Whatsapp就得。」何晞賢有啲燥咁彈番一句過去；賴智勇覺得好奇怪，好似何晞賢同楊悅盈對周Sir都唔係太友善咁。

講完之後，何晞賢望一望個鐘，然後就企起身行入房閂埋咗門。

楊悅盈慢慢消化番佢哋兩個頭先講嘅嘢，覺得好不安：羅彥輝變咗個人工智能，仲可以透過個電話睇同埋聽到佢哋…

「Chatbot…人工智能…」佢口噏噏咁講：「兩個Project…」

佢而家啲記憶，就好似用3G Network Load一套高清YouTube片咁：播幾秒就會停低Buffer，所以一直都係逐漸記番起啲零碎片段…

又醒番起有個男人。Jessica先係做Chatbot嗰個，個男人係做另一樣嘢…

警察…槍…

「你點呀？頭痛？」賴智勇見楊悅盈皺起眉合埋眼，關心咗佢一下。

「唔係…」只係諗極都諗唔起，有啲炆…

「好快無事架喇，唔使擔心。」賴智勇補多一句。

唔知佢係指楊悅盈啲記憶，定還是已讀不回死全家呢件事，反正楊悅盈兩樣嘢都唔肯定究竟幾時先會真係「無事」。

何晞賢忽然間「嘭」一聲打開房門衝咗出嚟，將四個電話丟喺枱面。

「快啲叫其他人唔好Quit Group，話俾佢哋聽區家純已經死咗！」佢一路好激動咁講，一路對住個電話不停襟：「打電話又好、Facebook又好，快啲！」

本身都心緒不靈嘅周Sir唔知係俾何晞賢感染到，定還是終於忍無可忍，佢一下企咗起身行埋何晞賢度。

「你又叫我唔好用電話，而家——」

「啪！」

何晞賢好俐落咁一巴車咗落周Sir面上。

「你唔幫手唔緊要，但係唔好阻鳩住！」佢好憤怒咁鬧周Sir。

賴智勇一早已經拎番起部電話望緊；陳佩珊唔知係反應唔切定係唔想理，反正佢就喺度望住周Sir同何晞賢食花生。

楊悅盈執番起自己部機，打開咗個Whatsapp；已讀不回死全家頭先收到幾條新Message——

——區家純Send出嚟嘅Message：

 

我發現咗個方法可以Quit完Group都唔會死

只要唔喺呢個Group入面之後，就唔使再驚Admin                  18:23

 

你哋邊個唔信我，唔緊要

我而家就Quit俾你哋睇

五分鐘後再Send Message俾你哋證明我未死                   18:25

 

18:25

6A-區家純 退出了

 

楊悅盈覺得好有可疑，但係估唔到有人——Crystal——竟然即刻就信咗。

 

18:30

6A-陳曉晶 退出了

 

「喂？唔好Quit Group呀喂…」賴智勇已經打緊電話俾人。

楊悅盈再望落少少，五分鐘之後嘅18:30，再Quit多咗兩個同學；今朝何晞賢同自己講過區家純同柯志恒係Partner，所以佢好直覺就諗到今次係柯志恒搞事。

佢錄咗句語音上去：

 

「唔好再Quit…區家純部電話喺柯志恒度…

頭先如果邊個收到區家純Message唔好覆…」            18:36

 

徐建文好快就回咗句：

 

痴撚線！唔覆即係叫我哋等死？           18:37

 

張浩榮Send咗張圖出嚟，係18:31分嗰陣區家純Send俾佢嘅Message：

 

@6A-柯志恒 點撚樣呀？係你Send過嚟架？          18:38

 

個Group一片混亂嗰陣，何晞賢收到電話。

「喂？區家純？你真係未死？」

佢一接完之後就講咗呢句嘢，令到在場楊悅盈等等幾個人聽到呆咗。

何晞賢見到大家都好震驚咁望住自己——雖然佢都一面愕然——佢就開咗個Speaker出嚟。

把聲有啲歇斯底里、有啲哽咽，但係的而且確係區家純。

「係呀！你話咩我Quit咗Group？我無呀！」