已讀不回死全家!

第46章 - 46 Unread Messages

Admin暗示陳佩珊同周Sir有路,但係我知道佢係想擾亂我。

 

你都痴撚線!              17:51

 

——無可能。我心面咁同自己講。

 

她剛剛就是從周世文老師家裏下來的

因為不想被你們發現,所以提早出門

沒想到和你撞個正著(笑)                   17:52

 

我再偷偷地昅咗陳佩珊側面一眼,佢挨咗埋牆、翹埋手,有啲心不在焉咁。

老實講,由第一日見到呢個女仔開始,我已經幻想過無數次同佢一齊,亦都幻想過無數次佢已經有男朋友…

但係周Sir?

如果係真嘅話——講唔出原因,但係我不能接受…

「喂!」我專登大聲咁叫佢,等佢驚呆咗一下之後問:「係呢…你住邊度架?」

「呀?廣源邨…」佢答完之後好似都Feel到有啲唔妥咁,補咗句:「但係我表哥住呢邊,我啱啱喺佢屋企走…」

——又會咁橋?我想補多一句,但係呢個時候我哋見到周Sir同賴智勇一齊行入車站,楊悅盈喺後面跟住。

陳佩珊都可能感覺到我會再追問佢,所以見到佢哋三個嗰陣好似皇恩赦咁唔理我,招手叫佢哋過嚟。

周Sir個表情好似食咗屎咁,呢個我理解;但係楊悅盈唔知咩事好似暈船浪咁。

「點?而家講得未?」周Sir直接走埋我面前,氣急敗壞咁問:「我而家點算好?」

——撚知咩。我心諗,然後望下佢,再望下陳佩珊,個心有少少乸住。

「上咗去周Sir度先,我今日有啲發現。」我繞過佢同另外三個人講,然後對住周Sir做咗個「請」嘅手勢。

周Sir再睥一睥我,然後就回頭行過去佢屋企——亦都即係頭先陳佩珊入嚟——嗰個出口;陳佩珊馬上跟咗上去,然後到賴智勇,我同楊悅盈並肩行最後。

…可能係心理作用,我硬係覺得陳佩珊同周Sir個距離有啲近。

我覺得自己已經開始俾Admin講嘅嘢擾亂緊,所以我拎番個電話出嚟覆咗佢一句:

 

你咪撚再同我亂講嘢            18:00

 

「咩事?」楊悅盈見我有啲怒氣沖沖咁,所以問我;佢把聲唔知點解變到好柔弱。

「你咩事就真。」受佢影響,我都係細細聲咁答佢:「暈車浪?」

「我記得唔係好清楚…但係我印象中頭先自己見咗…經歷咗啲好重要嘅嘢…」楊悅盈用力眨咗一下眼。

「好重要嘅嘢?同已讀不回死全家有關?」

楊悅盈搖搖頭,我唔明係代表「唔知」定「唔係」,然後佢慢慢將綁喺自己條腰上面嘅外套解開:頭先件外套遮住咗佢條裙個位,有一大撻血漬。

我Feel到自己塊面紅咗——M到?就係好重要嘅嘢?

然後佢攤番開件外套俾我睇,胸口個位一樣好多一滴滴咁樣嘅血漬。

「我頭先…應該爭啲爆頭…」佢一路行一路望住自己件衫上面啲血漬:「佢哋話我會慢慢記得番…到時就知…」

呢個時候電話又響咗一下,Admin條仆街又覆咗我Whatsapp。

 

我可沒有亂說

不然你可以問問楊悅盈                  18:02

 

我見到楊悅盈而家個款,唔係好忍心煩佢;所以壓住內心嘅懷疑袋番埋部電話。

行到去周Sir屋企大堂嗰陣,我不期然諗起允仔尋日喺度嗰陣,已經好似有啲唔妥。

如果我早啲留意到嘅話…可能就可以救番佢、甚至乎三條人命。

我同其他人一齊行咗入電梯。

 

***

 

賴智勇行咗入屋之後,見到周Sir屋企好大;然後佢好唔客氣咁坐咗喺梳化度,讚歎不止。

「周Sir你屋企好有錢架?咁咪食唔少女?」佢本身滿面倦容,但係都擠咗個笑容出嚟,似乎想搞個爛Gag緩和下氣氛;點知在場除咗楊悅盈之外,所有人——包括我——都用啲奇怪眼神望住佢。

賴智勇收咗聲,我將個電話Set番靜音之後喺張枱度坐低咗;我見周Sir又想開口,但係我舉起手制止咗佢,示意佢哋幾個坐低。

「不如你去斟杯水俾楊悅盈。」我對隔離嘅陳佩珊講,佢好聽話咁就行咗入廚房,拎咗杯水出嚟俾楊悅盈。

楊悅盈細細聲講咗句唔該。

 

你看她多熟這地方(笑)

最近暑假她幾乎每晚都在這裏過           18:07

 

我感覺到有股寒意喺心口入面——唔係因為諗起尋日陳佩珊一樣好純熟咁好快知道周Sir個廚房喺邊——而係因為Admin呢句說話好似已經證實咗我頭先喺車站嗰個諗法…

佢可以透過我哋啲電話聽到、甚至乎睇到我哋。

 

你知唔知你已經暴露咗自己?               18:07

 

「大家拎晒啲電話出嚟…」我對住佢哋幾個——除咗楊悅盈之外——下命令:「Admin係經我哋啲電話監察住我哋,我想將啲電話收埋晒先開始講嘢。」

賴智勇同陳佩珊一聽到,都馬上將個電話遞過嚟我度;周Sir半信半疑咁瞪大眼望住我。

「如果收埋咗嗰陣有人Whatsapp我咁點算?」佢好大聲咁問。

——嘖…死蠢…

「我會將啲電話放入你房閂埋門,然後每半個鐘去Check一次。」我將呢個白痴都諗到嘅方法講出嚟嗰陣,自己都有啲唔好意思。

「好似泊車入錶咁…」我聽到賴智勇自言自語講咗句。

周Sir似乎唔係太想交個電話出嚟,但係同我眼神對視咗幾十秒之後,終於屈服。

我連埋楊悅盈部電話,總共五部,Check咗一次大家都無收到新Message;望一望廳呢度個鐘,而家時間係大約係六點十分。

「房喺邊度?」

周Sir指向其中一道閂埋咗嘅門。

我將五個電話疊埋拎住,行過去打開咗道門:呢度係周Sir睡房,有一個衣櫃、一個床頭櫃、一個大得有啲過份嘅窗台…同埋一張大得有啲過份嘅床。

我放低啲電話喺床頭櫃上面嗰陣,見到Admin又Send多咗個Message嚟:

 

你知道周世文老師和陳佩珊每晚都在這裏幹點甚麼嗎?                   18:10

 

食屎啦屌你,唔撚想知呀仆街               18:10

 

我有啲粗暴咁掉低自己部電話,閂埋咗道門之後就行番埋枱坐低。

正當我喺褲袋拎張紙出嚟放喺枱面嗰陣,賴智勇率先就開咗口。

「我哋幾個今日去咗MTCC…我諗我大約知道Admin係啲乜嘢嚟。」賴智勇望住我講。

MTCC…估唔到羅彥輝竟然係去咗間大公司做暑期工…

我唔知道賴智勇所謂「知道」係堅定流,但係至少已經吸引咗我注意力。

賴智勇見我唔出聲,就開始講佢哋今日喺MTCC發生嘅事。

留言

    未有留言

分享