已讀不回死全家!

第45章 - 45 Unread Messages

睇完已讀不回死全家啲Message之後我寒咗一寒——柯志恒無講錯,睇嚟我哋一直都搞錯咗關鍵人物係邊幾個人。

而且最重要嘅係——Admin可以主動出手?

我唔知道Admin會做到咩程度,但係而家咁樣我哋完全無辦法防備,因為佢無時無刻都可以Send Message俾我哋任何一個…甚至乎幾個人。

腦入面好多問題、好亂,我想盡快同楊悅盈佢哋會合番。

諗咗一陣,我就打電話俾周Sir,但係打咗幾次都無人聽。

醒起頭先周Sir用賴智勇電話錄語音上Group;雖然唔知點解,但係至少我知道佢哋而家一齊,所以我改為打俾賴智勇。

「喂?」佢好快就聽咗電話;背景好嘈,佢哋應該仲喺街。

「喂?你而家係咪同周Sir一齊?」

「係呀…仲有楊悅盈。」賴智勇把聲好似好無助咁。

雖然唔知咩原因,但係睇嚟楊悅盈叫埋賴智勇同佢一齊去羅彥輝做過嘢嗰間公司。

「無事吖嘛?」

「有事呀,周Sir同楊悅盈都好唔妥。」

「咩事?」我聽到之後個心沉咗一沉:「你叫楊悅盈聽電話。」

賴智勇無答到我,我聽到佢把聲,但係唔知佢講乜,應該係拎開咗個電話同旁邊嘅楊悅盈講緊嘢。

「何晞賢?而家我哋點算?」電話另一邊變咗周Sir——佢啲語氣好慌張。

「我唔知;你哋今日嗰邊咩情況?」

「佢拉埋我落水呀!」周Sir好激動咁講:「你同楊悅盈之前唔係成日諗到計嘅咩?」

「我知…但係你冷靜啲先。」唔知係咪因為驚,我覺得呢個周Sir同我平時認識嗰個好唔同:「你同我哋一樣唔好用Whatsapp住,你見我哋咁樣做暫時幾日都無事…」

「你哋無事?四日就死咗差唔多三十人!」周Sir繼續講:「你點知下一個會唔會係我?」

「阿Sir,一係我哋而家去你度再傾下…」我有啲唔習慣同呢個周Sir講嘢:「你俾番個電話賴智勇先…」

「一日…唔係,兩日夠架喇,你諗到個方法Keep住我哋兩日唔死就得架喇!」周Sir以乎無意還番個電話俾賴智勇。

——但係點解佢會話兩日呢?

「得喇,我有辦法,但係當面講會方便啲!」唔想同佢講嘢,我惟有呃住佢先:「俾賴智勇同我講。」

「你有辦法?」

「係呀屌!」本身都一頭霧水嘅我俾佢逼到炆炆地,我唔顧得咁多鬧咗佢一句。

然後周Sir嗰邊就靜咗一陣。

「喂?點樣?」終於都變番賴智勇聽電話。

「周Sir做乜撚嘢?」我有啲煩燥咁問——當然我明白佢點解會咁,所以我又再補多句:「你叫佢帶埋你兩個番屋企,我而家過嚟見面再傾。」

「我叫佢?」賴智勇語氣好似有啲委屈咁,可能佢都怕咗周Sir。

「係,我而家過去,你哋去到再打俾我。」

收咗線之後,我換完衫,就將頭先喺LYFS個Page抄嘢落嚟嗰張紙摺起袋好,拎埋我同楊悅盈個電話準備出去。

行出房見到家姐坐喺飯枱用部Notebook上緊網,一面認真;佢見我出嚟,睥咗我一下,無同我講啲乜。

唔知佢係仲嬲緊我定係做緊正經嘢,不過我無理咁多,直接就出咗門口。

 

***

 

半個鐘都唔使我就去到大圍;一落巴士我就Send咗個Facebook Message俾賴智勇:

 

Hei Yin Ho:

我到咗,你哋喺邊?            17:16

 

Johnny Lai:

無咁快…我哋過咗海

我諗最快都要五點九之後先到               17:17

 

Hei Yin Ho:

咁…我哋喺大圍站等,你嚟到再打俾我          17:17

 

因為外面太曬太熱,所以我決定行入個站入面喺F出口等佢;正當我打算去便利店買嘢飲嗰陣先醒起我未同陳佩珊講。

行咗入便利店,我喺雪櫃前面又拎番個電話出嚟通知佢:

 

Hei Yin Ho:

我約咗周Sir佢哋再上佢屋企

五點九喺大圍站等,如果你到咗打俾我                  17:20

 

Send咗出去之後我就收埋咗個電話:知道佢一定唔會即刻睇,甚至睇咗都唔會覆,無謂睇住個Message變咗藍剔之後自己唔開心。

揀咗一陣,我打開雪櫃拎咗支咖啡。我平時好少飲;但係醒起家姐成日話飲咖啡提神,所以我諗住試一試。

最近成日都唔夠瞓,雖然一啲都唔眼瞓,但係精神有啲攰。

行番出去企喺便利店門口等,我扭開支咖啡飲咗一啖…唔覺得有咩效。

企咗一陣,又習慣性拎番部電話出嚟,見到陳佩珊覆咗我!

我好唔爭氣咁興奮咗一秒,然後即刻Unlock咗部機睇佢個Message:

 

Rita Chan Pui Shan:

OK,我而家嚟              17:23

 

我唔知陳佩珊住邊度,但係暗中希望佢唔好住得太遠、快啲到,等我同佢可以喺賴智勇佢哋嚟到之前——

——咦?

最初以為自己眼花,但係馬上就見到陳佩珊喺F出口行咗入個站入面;佢好似無留意到我,淨係一路望住個電話行埋嚟便利店呢邊。

「喂!」我去咗佢隔離叫佢一聲,嚇咗佢一跳。

「呀!」佢抬高頭睜大眼望住我,好驚訝:「你…你又話五點九嘅?」

「佢哋要五點九先到,但我啱啱已經到咗。」我望下電話個時間,仲有十分鐘先到五點九:「好快啫,我哋等多陣就得。」

「嗯…」佢望住我應咗聲,表情有啲尷尬。

情不自禁咁回憶起我攬住佢嗰陣嘅感覺…

「係呢,你住得好近?」由我Send Message俾佢到我見到佢,都係十零分鐘左右嘅事:「咁快到嘅?」

「係呀…」同我獨處佢好似有啲唔自然;佢指一指便利店:「我去買啲嘢先。」

望住佢行入去嗰陣,我硬係凝住佢可能諗住喺入面「揀嘢」揀到周Sir佢哋到咗先會出番嚟。

有啲失望之際,我部電話收到Whatsapp。

係Admin Send俾我嘅。

 

何晞賢,一直見你那麼努力

所以我把第一個Message獻給你           17:36

 

我屌?

 

你想我死?                  17:36

 

不是,只是見你獨自等候,女神又不理你

怕你會悶(笑)          17:37

 

心寒咗一下,然後我好似痴線佬咁周圍望——佢點知啱啱發生咗咩事?

 

你喺邊?             17:39

 

告訴你一件事

我每次只會與一個同學對話                   17:39

 

喺我附近大部份都係啲師奶或者中年女人,有幾個女仔喺出口外面圍埋一齊玩緊電話;但係佢哋全部都唔似係Admin。

諗起今朝自己睇LYFS個Page嗰啲Post…

 

你喺邊?

你係人定鬼?             17:41

 

Admin無答到問題,而係講咗呢樣嘢俾我聽。

 

答案就在你眼前(笑)

所有的答案其實一直都在你眼前           17:41

 

眼前…我望住部電話,有個諗法一閃而過——連我自己都覺得好痴線嘅諗法…

 

不要想了,我只想和你好好聊天

記住30分鐘回覆我              17:42

 

我開始唔知點覆佢好…同時見到Admin輸入中…

「做咩呀?」陳佩珊唔知幾時番咗嚟,拎住枝茶企喺我隔離;佢望住我個樣有啲不安,我諗我啲面色應該好差。

 

但是如果你想我轉移對話目標的話

就把已讀不回死全家入面隨便一人的名字回覆給我

我不會告訴對方是你把我的訊息轉移過去的(笑)                  17:44

 

「呃…無嘢…」我唔想話俾佢聽Admin直接Whatsapp我、嚇親佢,所以我求其講:「佢哋就快到。」

 

你對面前這個女孩子認識有多少呢?             17:45

 

我唔知Admin係咪想威嚇我,總之我將個電話轉咗少少角度等陳佩珊睇唔到我個Mon。

 

你唔好搞佢!              17:46

 

陳佩珊見我有意唔俾佢睇我電話,就無再望過嚟。

 

你別誤會了,搞上她的是周世文老師

不是我(笑)              17:47

 

——周世文老師?

喺我仲未消化到——應該話接受到——呢句說話嘅意思嗰陣,個Whatsapp就彈走咗。

 

6A-賴智勇

來電

 

「我哋到喇…你喺邊?」我一接咗之後,賴智勇劈頭就問。

「F出口。」好簡單答完一句就收咗線,入番Whatsapp。

望住呢句嘢,忍唔住再望下陳佩珊——佢頭先十分鐘都唔使就喺周Sir屋企樓下出現…

可能係心理作用,我開始覺得陳佩珊頭先見到我嗰陣唔係驚訝…而係有啲心虛…

留言

    未有留言

分享