已讀不回死全家!

第42章 - 42 Unread Messages

「Facebook、Whatsapp定Telegram?」Jessica又重覆咗一次個問題。

楊悅盈同周Sir、賴智勇互望咗一下,大家個表情都好震驚;但係Jessica似乎無諗過要解釋啲乜嘢,只係繼續笑笑口,交替望住佢哋三個。

「Whatsapp…」見周Sir同賴智勇都唔敢出聲,楊悅盈惟有答佢——淨係講到呢個程度,應該唔會有事?

「Whatsapp,發生咗啲乜嘢事?」Jessica成個身向前傾,睜大對眼望住楊悅盈,好似好有興趣咁繼續問。

「石小姐——」周Sir一開口,Jessica就對住佢舉起手示意佢收聲。

「——唔好嚇親我啲學生,不如你解釋下係乜嘢事先。」但係周Sir無理到佢,仍然繼續講埋下半句。

「我都未清楚係乜嘢事,你俾妹妹仔講埋先。」Jessica把口咁講,不過楊悅盈知道佢其實心入面有個譜。

雖然對呢個女人無乜好感,但係楊悅盈好驚講錯、講多咗啲乜嘢,會害死佢——知道同學係爆頭死,但係自己一次都未目擊過;佢唔想咁近距離親眼見到。

「唔使驚。」Jessica好似識讀心咁:「我都話咗輝仔用嘅係我哋嘅技術,我知道我唔會有事。」

楊悅盈皺起眉望住佢,唔知信唔信佢好。

「羅彥輝用個新電話開咗個Group,然後令到我哋同學之間已讀不回人哋Message嘅人…」賴智勇衝口而出,唔知係相信Jessica唔會死,定係純粹唔Care:「令到佢哋個頭爆炸…」

Jessica一面滿足咁挨番落張櫈度,好似諗緊嘢咁;楊悅盈、周Sir同賴智勇都望住佢,氣都唔敢抖——

「做咩啫?都話我唔會有事。」Jessica發現在場三個人都驚驚哋咁嘅表情,笑住同佢哋講:「我又唔係你哋。」

「吓?」賴智勇有啲難以置信。

「嗯,不如你直接借個Whatsapp我睇下?」Jessica對住賴智勇講,佢諗咗一下——就推咗個電話過去。

「裏面有個Group叫做…」賴智勇始終都猶豫咗一下:「叫做已讀不回死全家。」

Jessica聽到個名,好似覺得好搞笑咁笑咗出聲,然後就拎起部電話開始睇。

——搞乜撚?周Sir對住楊悅盈做口型問;楊悅盈聳聳肩。

「OK,總算知道成件事係點。」Jessica俾番部電話賴智勇,然後伸咗個懶腰:「其實我哋一直都Deal With緊件事,而家睇完之後我應承你哋,俾多一日時間我就可以搞掂件事。」

「…不如,你講清楚啲。」周Sir沉聲同佢講。

「我無義務同你哋解釋架喎。」Jessica又笑笑口咁講,但係對住楊悅盈加多句:「但係如果妹妹仔陣間肯陪我傾多陣,我就將可以講嘅嘢都同你哋講。」

妹妹仔…楊悅盈雖然唔係好鍾意呢個女人咁叫自己,但係佢都點點頭。

「嗱無得反口架。」Jessica指住楊悅盈講。

「得喇。」楊悅盈有少少唔耐煩。

「輝仔嗰陣同一班後生仔一齊, Under我一個開發ChatBot嘅Project。」Jessica難得收起咗笑容,開始認真:「佢哋做嘅嘢就係幫我哋個Program學習,變成一個似後生仔而又可以Pass到Turing Test嘅System。」

楊悅盈其實唔係好跟到佢講啲乜,仲喺度消化緊。

「你意思係…」賴智勇似乎Follow到:「Admin唔係鬼、而係一個ChatBot嚟?」

「點?好失望?」Jessica繼續講:「老實講,我哋呢個Project搞咗咁耐,未試過有成功例子;所以見到你哋個Whatsapp Group嗰陣——得罪講句——我有啲興奮。」

「你話俾多一日時間你就可以搞掂…」周Sir問:「點解?」

「我哋公司知道有啲技術同埋實驗結果外洩咗,其實已經處理緊;就算你哋唔上嚟,無同我對話,件事一樣會好快解決。」佢個笑容出番嚟,對住楊悅盈同賴智勇講:「反而今日喺你哋聽到成件事,搞到我心情好好;或者我應該多謝番你哋。」

然後佢就無再出聲。

「跟住呢?」周Sir見Jessica唔再講嘢,主動問佢。

「跟住…請你同男同學出番去先,我想同妹妹仔傾下計,好快。」佢微笑答番周Sir。

「但係——」

「無但係喇,我話咗我會將可以講嘅嘢講晒出嚟。」Jessica個笑容好似整蠱完人咁:「頭先已經講晒喇。」

周Sir面色一沉,似乎想發嬲;但係Jessica好快拎咗佢自己個電話出嚟。

「為人師表要講口齒;一係你自己行出去,一係我Call Secure。」

「你哋出去先啦。」楊悅盈都開口講。

周Sir無辦法,惟有屈服,企起身氣沖沖咁走咗過門口;賴智勇都跟咗過去。

「你自己小心啲。」周Sir望住楊悅盈講多一句,就同賴智勇一齊離開咗會議室。

 

***

 

周Sir佢哋行咗出去之後,Jessica仍然一直無講嘢,而係拎起佢頭先放喺枱嗰疊文件睇。

得番自己同呢個女人喺度,楊悅盈開始有啲緊張。

「你…想同我傾乜嘢?」終於忍唔住開口。

「你等多陣。」Jessica唔係太高興:「見唔到人做緊嘢?」

楊悅盈惟有唔出聲繼續等;佢平時無帶開錶、電話又喺何晞賢度,加上賴智勇啱啱走埋,佢連自己等咗幾耐、而家咩時間都唔知。

感覺上好似又過咗一個鐘,Jessica終於冚埋咗份文件,拎起部電話Send咗個Email出去,跟住有啲誇張咁伸咗下懶腰。

「唔好意思,有啲Urgent嘢。」佢心情好似已經變番好。

「嗯…」

「其實我想問下你,你同輝仔係乜嘢關係?」完全無開場白,Jessica就單刀直入;楊悅盈連點解佢要咁問都唔知。

「呀?呃…同班同學…」

「有無拍過拖?」

楊悅盈即刻不斷咁搖頭,塊面開始有啲紅。

「…問呢樣做乜?」

——但係佢好似暗戀我…?心入面咁諗,但係講唔出口。

「哦…」Jessica似乎有啲失望,拎番起自己部電話嚟襟,連望都無再望楊悅盈:「無嘢喇,你走啦。」

叫佢喺度等咗咁耐,然後問佢一個無謂問題就打發自己,楊悅盈有啲嬲;而且佢仲未搞清楚自己最想知道嘅嘢。

「你成日話你哋啲技術你哋啲技術;究竟係咩技術可以用嚟殺人?」

Jessica聽到之後啞然失笑。

「都係嗰句,我可以講嘅都已經講晒,你再問都係晒氣。」Jessica繼續望住個電話,好似已經完全對楊悅盈失去咗興趣咁。

但係楊悅盈依然坐喺度唔郁,Jessica見佢無乜想走嘅意思,表情變得有少少不滿。

「門口喺度,番去做暑期作業啦。」佢舉起隻手指指住自後身後面道磨砂玻璃門。

終於…楊悅盈終於都忍唔住。

「因為你哋我大半班同學已經死咗!」佢雙手好用力咁拍枱,企咗起身大聲鬧:「唔好再同我講你『可以』講乜『唔可以』講乜呀,仆街!」

講完之後,楊悅盈見到Jessica同自己一樣,塊面都開始泛紅,而且個笑容變得有啲唔自然;呢種女人平時少受氣,而家竟然俾個妹妹仔發惡鬧,所以睇嚟佢都動咗氣。

佢嘅眼光離開咗部電話,望番住楊悅盈。

「我一定要知道佢哋點死,點樣先避免到。」楊悅盈一啲都唔赦佢:「…你如果唔俾個答案我,我唔會走。」

自己講完出口之後,楊悅盈都知道呢個只係一個無用嘅空洞恫嚇。

但係估唔到——

「OK…I give in…」Jessica竟然咁講;佢再次開始襟電話:「其實都幾諷刺,呢個Project本身係用嚟針對你哋…但係你就咁Persist要知道。」

楊悅盈聽到呢句,怯咗一怯。

「咩呀?頭先仲咁惡,而家驚呀?」佢抬起眼望咗楊悅盈一下,然後企咗起身。

「自從年半前暴動之後,我哋就同時開始咗兩個Project。」Jessica拎起個電話唔知Set緊乜嘢,一直慢慢行過去楊悅盈度:「隔離Team整咗呢樣嘢出嚟,但係太過有效、太過成功,所以變咗失敗品。」

佢走到去面前,楊悅盈聞到佢身上面嗰陣淡淡嘅香水味,同時留意到原來佢高自己成半個頭。

「坐低。」Jessica輕輕推咗佢膊頭一下,用命令式語氣講;楊悅盈惟有乖乖地坐番低。

「太過有效所以變咗失敗品…要嚟形容你哋個Admin好似都幾適合。」佢喺隔離櫈度,翹起雙腳坐低咗。

——咩意思?楊悅盈想問嗰陣——

「搞掂。」Jessica對住楊悅盈講,然後指一指自己左手上面個電話:「唔使睇架,你聽下。」

楊悅盈做好心理準備——雖然唔知準備啲乜嘢——無論一陣個電話有啲乜嘢都好…

但係當Jessica將個電話轉過嚟,個Mon對住楊悅盈嗰陣,佢就毫無先兆咁聽到一個又尖又響嘅怪聲。

——嘈到…好似有人裝咗個喇叭喺自己個腦入面咁——

——痛?暈?唔知點形容嗰種感覺——

Jessica見到楊悅盈雙眼忽然撑大、揞住耳仔,知道佢開始中招,所以趁呢時候從後伸手捉住佢個頭推埋張枱度。

——揞住耳…但係仍然聽到嗰個怪聲——

先將佢個頭襟喺枱面,再用成隻右手施力壓住佢背脊;楊悅盈成個上半身被Jessica壓住,而且開始全身無乜力,完全掙扎唔到。

——雖然自己放聲大嗌,但係除咗個怪聲之外乜都聽唔到…連自己把聲都聽唔到——

Jessica嚇咗一嚇,估唔到妹妹仔叫得咁大聲;會議室雖然有三面牆做咗隔音,但係始終有一面係玻璃,難免會傳到聲出去。

——聞到啲血腥味——

望一望楊悅盈個樣——雙目無光,神情呆滯,開始有血由佢個鼻度滲出嚟。

Jessica即刻放低咗個電話,然後捉住楊悅盈膊頭將佢擺番埋個位;楊悅盈好似隻公仔咁軟癱咗落張櫈度,個頭向下垂,Jessica留意到楊悅盈啲血不斷滴落佢件白色衫度。

「Oh Shit…」望番過去枱面,果然有啲血漬。

Jessica睇一睇時間,而家16:17;抖一陣再去叫人入嚟善後,但係就辛苦頭先嗰個班主任喺外面等多一陣喇。

佢喺隔離個位坐番低,發現自己有啲喘氣,唔知係因為制伏楊悅盈嗰時太攰,定還是有啲亢奮。

「點呀妹妹仔,俾咗個答案你喇…你點睇?」Jessica笑住咁問——雖然佢唔知楊悅盈其實仲有無意識。

留言

    未有留言

分享