已讀不回死全家!

第4章 - 4 Unread Messages

我分別同Billy允仔對望一眼,大家嘅眼神都有啲怕,有啲擔心。

 

請將我的電話號碼存入你的通訊錄,設定名稱為「Admin」

1分鐘內未設定者——死亡!                18:53

 

搞乜春?

 

雖然唔知搞乜春,但係見到「——死亡」,我哋三個幾乎同時Tap咗下+852 6109 XXXX,「新增至通訊錄」,將佢個名Save做Admin。

 

唔使30秒就搞掂,但係過咗足足一分鐘,+852 6109 XXXX——Admin先至有新Message。

 

哈哈哈!全員通關呢!

可惜上面只是騙你們的啊,騙‧人‧的!

以下才是貨真價實的新規則,即時生效:              18:55

 

*6. 把遊戲的存在以及任何資料告知此Group以外的第三者——該名第三者死亡! [規則追加]                  18:57

 

規則追加?

「仆街!啲規則仲可以加?」Billy忍唔大聲講:「咁你玩撚晒啦!」

佢無打落個Group度,當然Admin睇唔到,所以Admin繼續出Message。

 

Admin發現有同學擅自對同學以外的人提起遊戲

這是絕對不容許的!

由於規則沒有說明,所以現在追加一條!

再犯者——死亡!                18:58

 

我感覺到Billy和允仔都望住我,但係…我無同人講過架喎!

 

@Admin我有問題想問                  18:58

 

出現一條唔係來自Admin嘅——而係來自6A-楊悅盈——嘅新Message。

 

乜嘢係「關鍵人物」?                  18:59

 

見到楊悅盈個問題之後…

 

我比頭先等Admin出字嗰陣更加緊張:雖然我哋都有啲個Group度留過言,但係從來無人直接同Admin對過話。

 

Admin輸入中…

 

楊悅盈——我哋班上面其中一個最唔起眼嘅女仔,估唔到竟然敢直接問Admin嘢…

 

「關鍵人員」就是關鍵人員!非死不可的人呀!

要不就他們全員死亡,要不就死掉大多數的6A班同學吧!             19:00

 

「乜撚嘢…」我聽到Billy細細聲講咗句。

 

遊戲規則已經追加了,下面再給你們仔細看一次!

還有,其中一位關鍵人員今天已經因為Quit Group死掉了!萬歲!

因為Admin太開心了,就在下面再加上一個線索給你們!                   19:01

 

遊戲規則:

1. 收到並讀取同班同學Whatsapp Message,必需在30分鐘內回覆。

2. Group Message不在此限。

3. 用Emoji或者無意義語句回覆者——死亡!

4. Quit Group者——死亡!

5. Send Message給死者——死亡!

*6. 把遊戲的存在以及任何資料告知此Group以外的第三者——該名第三者死亡! [追加規則]

 

勝利條件:

1. 6A班全員死亡!

2. 6A班倖存者兩人或以下!

3. 關鍵人物全員死亡! (進度:1/4)               19:02

 

明天同樣時間再見!            19:02

 

我留意到差唔多到時間,所以提醒允仔回覆我;好快,未夠30秒就聽到Whatsapp響。

咦?

唔係我?

「吓?」Billy望住部電話,非常驚訝:「楊悅盈Send咗個Message俾我,叫我Call晒所有同學聽日番學校。」

「番去做乜?」允仔Send完Whatsapp俾我之後問Billy。

「佢私底下Send Message俾你?」我反而著眼呢點。

「係呀。」

「你問下佢番去做乜?」以防佢唔記得覆,我重覆一次允仔個問題提醒佢。

Billy好似仲未發現到,佢同楊悅盈之間已經開始咗個Loop;楊悅盈覆佢嗰陣,Billy會唔會專登不讀不回,用自己做白老鼠呢?

電話響;唔使望我都知係邊個打嚟。

「何晞媛,到咗?」

「係呀,喺你學校門口。」

「允仔屋企無人,佢今晚想嚟過夜…」見到允仔一面期待望住我,我惟有咁講。

「好呀!咁你叫佢出嚟?」

「唔使,佢同我一齊,我哋而家落嚟。」

收咗線之後,我哋同Billy道別,然後向學校方向行;允仔完全無半點掩飾心入面嘅興奮。

佢千方百計想去我屋企,其實只係想J我家姐。

留言

    未有留言

分享