已讀不回死全家!

第39章 - 39 Unread Messages

楊悅盈發咗個夢,搞到佢成晚都無好好瞓過。

佢著住校服,企喺禾輋邨天井向上望,睇住羅彥輝行出門口,爬過條欄杆跳落去——當然,羅彥輝死嗰陣佢唔在場,成個情境只係佢自己想像出嚟,而且佢好清楚自己係發緊夢。

但係佢郁唔到,只能夠望住羅彥輝跳落嚟,嘭一聲跌喺自己面前。

一朵血花以羅彥輝個頭為中心爆出,噴出嚟嘅鮮血同腦漿濺咗上楊悅盈對鞋、襪、甚至條裙上面,然後帶泡嘅血不斷由佢口同鼻流出嚟;對眼望住楊悅盈,但係已經無再眨…

楊悅盈仲未嚟得切驚嗰陣,又見到上面幾層開始有人影爬出嚟——睇唔到樣,但係著住楊悅盈同一間學校嘅校服——啲人影逐一無乜規律咁跳落嚟。地上面嘅紅色液體越積越多,浸過咗佢成對鞋。

雖然有啲恐怖,但楊悅盈無好似平時發惡夢咁即刻紮醒,反而不斷咁問自己:如果自己一早知道羅彥輝想死,佢有無能力阻止到?

瞓醒嗰陣,楊悅盈睜開眼望下床邊個鐘:隱約見到而家十二點。

佢戴番眼鏡行出房外面。梳化上面有張被冚住一個人,佢知道楊啟臻又打機打通宵,應該啱啱瞓咗無幾耐。

梳洗完之後,楊悅盈就打咗個電話俾周Sir。

「我而家準備出去。」招呼都無打,佢直接就咁講:「一陣喺大堂度等。」

「吓?哦,好,咁我都出門口先。」

「同埋,你打個電話俾賴智勇,叫埋佢一齊。」楊悅盈忽發其想補咗句;自從尋晚知道咗周Sir同陳佩珊件事之後,佢唔係好想同周Sir兩個人單獨出嚟。

「賴智勇?點解?」

「你叫埋佢就OK,唔好問。」楊悅盈講完之後,一如以往咁Cut咗周Sir線。

番入房換完衫之後,佢開番個Mon望一望;何晞賢Send咗個Message俾佢:

 

Hei Yin Ho:

瞓醒未?無乜嘢吖嘛?

有咩事就打俾我啦                11:34

 

——係咪Send俾陳佩珊啲Message Send錯咗過嚟?楊悅盈心入面咁諗;但係有人主動關心自己,佢覺得有少少開心。

 

柯志恒同區家純係一Pair,好似我哋咁

尋晚有人未讀訊息死,我懷疑都係佢哋搞出嚟                11:50

 

楊悅盈對呢個話題有啲好奇,但係都只係覆咗何晞賢一句。

 

Yuna Yeung:

唔好理柯志恒住,你今日集中睇個Page

我夜啲再搵你              12:24

 

然後佢閂番個Mon,拎番個袋就出咗門口。

 

***

 

楊悅盈唔鍾意搭地鐵,所以揀咗坐巴士過海;嚟到鰂魚涌嗰陣已經差唔多兩點。佢尋晚已經喺Google睇過地圖,打算憑依稀嘅記憶行過去。

一落地就感覺到一陣熱氣撲埋嚟,然後佢個眼鏡起咗霧;楊悅盈除低個眼鏡,行埋一邊用張紙巾抹番清塊鏡片。

短短呢十幾秒,佢已經覺得俾太陽曬到佢全身好似就嚟燒著咁,行嗰陣佢盡量留喺樓底陰頂度;沿路上每一次同啲西裝嘅上班族擦身而過嗰陣,楊悅盈都覺得佢哋好勁:三十幾度佢哋仲可以著住成套西裝加外套,好似完全感覺唔到啲陽光或者熱力咁。

過咗兩個街口左右,佢就見到佢嘅目的地:MindTech House——一棟全玻璃幕牆嘅摩天大廈。MindTech係一間27年前成立嘅香港公司,憑住搞IT、電訊科技等等,而家已經係一個上市大集團。

楊悅盈去到門口,自動玻璃門打開嗰陣佢感覺到裏面啲冷氣好勁,佢行入去嗰陣喺袋度拎咗件外套出嚟,一路著,一路四圍望;個大堂有幾個籃球場咁大,但係除咗個Reception同幾張梳化之外無其他雜物,所以一目了然見到周Sir仲未到。

佢行過去水牌度望,準備要去拜訪嘅MindTech Cyber Communication——MTCC——就喺最高嗰兩層65同66/F;雖然棟大廈叫MindTech,但係其他層數都係租出嚟去商用單位。

「喂!」忽然間有人喺後面拍佢膊頭。

原來賴智勇啱啱到咗;楊悅盈同佢唔熟,而家應該係第一次喺學校以外嘅場合見面。

「你都係周Sir叫過嚟架?佢係咪仲諗住幫我地補課?」賴智勇笑笑口咁問。

「其實——」係我叫你嚟嘅——楊悅盈免得要解釋,忍住咗口無講呢句:「…係呀,佢好似話有啲關於羅彥輝嘅事想過嚟問下。」

「阿輝…」賴智勇收起咗個笑容耷低頭講:「佢死之前有Whatsapp過我話番工唔開心,但係我當時無理到佢…」

「唔好咁啦…無人想。」楊悅盈講完出口都覺得有啲奇怪,佢發現自己最近好似成日安慰人咁。

聽到電話響咗,賴智勇就拎咗出嚟聽。

「哦,好,到咗喇。」聽到佢咁講,楊悅盈估周Sir已經到咗。

果然,周Sir無幾耐就穿過道自動門入咗大堂,同行嘅仲有嗰個中年警察;楊悅盈記得佢好似姓文。

「文Sir,大家見過一次。」周Sir簡單咁介紹一次。

「唏…你先係阿Sir,啲小朋友叫我山哥得喇。」佢對住周Sir禮貌咁講,然後又對楊悅盈同賴智勇點點頭。

「關於我哋班嗰單案,因為呢度可能會搵到線索,所以我叫文——山哥幫手約咗呢度啲人傾傾。」然後周Sir又好似對住山哥介紹自己啲學生咁:「佢哋係賴智勇同楊悅盈,羅彥輝生前嘅朋友。」

「警察叔叔,你唔係話我哋啲同學係意外死嘅咩?」

楊悅盈記得尋晚周Sir提過啲警察咁樣講;佢最憎呢啲為咗方便自己就罔顧事實嘅大人,所以佢專登好挑釁性咁向住山哥講:「你過嚟諗住傾乜?」

山哥有啲黑面,而周Sir亦都罕有地怒睥咗一下楊悅盈,然後細細聲同山哥講咗句嘢,應該係「管教不善,多多包涵」之類,反正講完之後兩個大人就開始行過去電梯口。

賴智勇聽到佢咁樣窒個警察,所以用一個敬佩嘅眼神望住楊悅盈。

而楊悅盈就望住周Sir同山哥個背影,覺得呢兩條友根本係一擔擔。

留言

    未有留言

分享