已讀不回死全家!

第36章 - 36 Unread Messages

我番到屋企嗰陣已經差唔多一點,家姐坐咗喺梳化度仲未瞓,但係睇佢個樣似乎好攰。

電視無閂到,一直開住新聞台。

一見到我行入門口,佢即刻企起身來勢洶洶咁走埋嚟。

我頭先Miss咗佢十幾個Call,一直凝住佢想過嚟打我;一晚之內已經分別俾兩個女仔各打咗一巴,我唔想番到屋企仲要食多一嘢,所以我準備舉起手擋。

「死咗去邊呀?」佢見我護住自己,改為破口大罵:「打俾你又唔聽;頭先上網睇新聞話瀝源死咗人,我又唔知你有無事!」

「而家咪番咗嚟囉…」我輕輕力推開佢,然後行咗過梳化度坐低;其實係我自己唔啱在先,衰在我無乜心情,所以唔想講咁多嘢。

但係家姐無打算放過我,佢坐咗喺我隔離,90度轉過嚟面對住我。

「頭先張允行打嚟同我講…」家姐清咗一下喉嚨之後繼續講:「…同我講佢鍾意我?你哋搞乜嘢?玩我呀?」

允仔…打咗俾家姐表白?

唔知點解我聽到之後覺得有啲搞笑——條友自從第一次上完嚟之後,成日都問我何晞媛有無男朋友,又成日想借啲依上嚟睇佢,但係每次嚟到都唔敢同我家姐講嘢——我諗起允仔啲柒事,情不自禁咁笑咗出聲。

「笑咩?何晞賢你唔好——」家姐見到我咁笑法,以為我哋真係夾埋玩佢,就諗住發我脾氣——

但係當佢見到我笑到流眼淚嗰陣,就無再講落去。

「允仔頭先死咗,你睇新聞話瀝源死咗人,九成就係講緊佢同埋我另一個同學。」我笑住咁用手背抹走啲眼水:「所以我諗佢唔係玩你;佢係想臨死前認真一次。」

佢聽到我咁講,唔知俾咩反應好,但係似乎Feel到我無講大話。

「同埋,Billy尋日上完嚟,同我哋番咗學校之後都死咗喇。」我繼續講:「臨死之前我仲同佢因為某啲事嘈咗幾句,撐得好行。」

家姐聽到我咁講,似乎消咗氣,又或者可能佢本身就只不過係喺度扮嬲;佢坐咗埋嚟,俾我挨落佢膊頭度喊。

我自從小學畢業之後,都未試過喺佢面前咁樣喊法,我知道家姐一定有好多問題想問我,但係佢都無出聲,淨係一路輕輕力拍我背脊。

唔知過咗幾耐,我開始收聲,家姐先至敢用把我十幾年都無聽過佢咁溫柔嘅聲線嚟問。

「話俾我聽…其實你哋之間,發生咗咩事?」

我知道佢真係關心我,但係好可惜,我唔可以同佢講。

對住佢搖搖頭之後我捽捽自己對眼,就起身行番入房鎖埋門;我有啲驚家姐會敲門叫我出嚟同佢講清楚件事,好在佢無。

我將自己同楊悅盈部電話開番鈴聲,校到最大聲放喺枕頭邊。

完全無心情瞓覺,我連衫都無換就趴落床,拎番自己部開咗LYFS個Page嚟睇。

無幾耐我合埋眼諗住閉目養神一陣。

然後唔小心瞓著咗。

留言

    未有留言

分享