已讀不回死全家!

第34章 - 34 Unread Messages

楊悅盈停咗一停,喺腦入面整理好啲句子之後,喺個Group度補多一句:

 

「洪諾言如果真係死咗嘅話,關鍵人物就得番徐建文一個

而且我今日都講過,我哋好快會有新進展

所以如果而家有人再想整死我哋班除咗徐建文以外嘅人

都好有可疑」             23:27

 

個Group靜咗一陣,然後徐建文點名覆咗楊悅盈:

 

@6A-楊悅盈 我屌你老母呀!冚家剷!                   23:29

 

「狗口長不出象牙…」楊悅盈呢個時候先同何晞賢講咗句,好似想令到個氣氛輕鬆啲。

頭先如果唔係上天台嗰陣撞到Crystal,聽到佢講嗰句嘢,楊悅盈都未必知個情況咁危急;但係而家何晞賢部電話似乎無乜動靜,應該暫時又幫佢擋咗一劫。

佢睇一睇同謝石俊啲Chat History,21:53嗰陣謝石俊有個Whatsapp Send咗過嚟,然後自己秒回咗;佢知道張允行喺最後選擇咗救自己…

亦都即係謝石俊已經犧牲咗——為自己而犧牲咗。

諗到呢一點,楊悅盈視線又忽然模糊咗,感覺就好似當日喺禾輋邨睇住同學Send Whatsapp去羅彥輝度,自己又無能力阻止嗰陣咁樣。

因為何晞賢喺隔離,佢唔想俾人見到自己喊,所以用手捽咗捽眼;之後先發現何晞賢根本就無留意自己,佢只係望實自己個Whatsapp好似出咗神咁。

本身楊悅盈嘅安排:自己同謝石俊、何晞賢同張允行兩Pair人對Send,而家已經斷咗…佢想提出自己同何晞賢組成一Pair繼續Loop落去,但係楊悅盈唔忍心同佢講住。

佢企番起身,摸摸何晞賢個頭。

「無事喇…好快就無事架喇…」佢同何晞賢講;當然呢啲係安慰說話。

何晞賢繼續望實個電話多一陣,先至回應楊悅盈。

「好快無事…?」何晞賢用手踭撐住坐番起身:「其實都係…」

佢盤腿坐咗喺度,拎起自己部電話襟咗兩下。

「搞咁多做乜;不如好似允仔咁,自己郁手?」佢開咗自己個Facebook Messenger俾楊悅盈睇——除咗洪諾言之外,原來張允行連徐建文,甚至柯志恒都想引埋出嚟:「劉楚恒、Billy、洪諾言…搞掂埋徐建文,唔係就完喇咩?」

楊悅盈舉起手,一巴打咗落去何晞賢本身已經紅咗嘅左邊面度。

「你咁講對唔對得住一路幫手搵出路嘅同學?對唔對得住我?」聽到何晞賢咁講,佢有啲激動:第一日已經諗到全滅四個關鍵人物嚟完咗個遊戲,甚至乎諗過要帶住全班一齊達成呢個目標…

但係當佢見番啲同學,見番有血有肉,同窗咗至少兩三年嘅同學之後,佢就知道自己落唔到手;無論用咩方法都好,佢落唔到手整死自己嘅同學。何晞賢雖然啱啱死咗兩個佢最Close嘅朋友,但係諗到要親手去殺人呢一步,楊悅盈都係原諒唔到佢…

「明明今日…今日已經講好咗我哋之後應該點做…」楊悅盈發現自己把聲又有啲哽咽,又再舉起手諗住打埋去。

何晞賢捉住咗楊悅盈右手,有啲尷尬咁笑咗出嚟。

「Sorry…我頭先…我唔係太清醒…」佢苦笑住對楊悅盈講:「我明架,如果我哋自己落手…就正中Admin下懷係咪?」

「問題未解決,唔好俾負面情緒影響到自己判斷。」楊悅盈答咗佢一句。

何晞賢無再講啲乜。

只係放開咗楊悅盈。

然後伸手幫佢抹走咗啱啱流出嚟嘅一滴眼淚。

留言

    未有留言

分享