已讀不回死全家!

第33章 - 33 Unread Messages

我同Crystal坐喺度,大家都無郁、無講嘢。我一直提防住佢突然撲過嚟搶番自己部電話,所以雖然陳佩珊部電話響咗幾次,我都無接;但係Crystal似乎無咁嘅打算,只係一直睥住我。

唔知隔咗幾耐,啲警察清完場之後就開始走,啲街坊見無嘢睇,都陸續散開。

等到附近得番我同Crystal兩個嗰陣,我望一望手上面個電話:23:12分…我哋喺度呆坐咗差唔多半個鐘。

我扶住牆慢慢企番起身,拍一拍身上啲塵;周Sir同陳佩珊一直都無出現過,我諗…周Sir煩惱緊去邊度洗車?

呢個時候竟然仲想搞爛Gag…我開始懷疑自己可能都開始有啲問題。

「喂。」我袋埋Crystal部電話,伸手想扶佢起身:「我真係唔知允仔約咗洪諾言出嚟;唔信你上天台我證明俾你睇。」

佢用力撥開我隻手,自己起番身,但係似乎打算跟我上天台。

我保持住慢速咁行,盡量同佢平排,因為我唔想行前面用個背對住佢…我唔知佢會做啲乜。

轉彎上最後一格樓梯嗰陣,我望到樓梯頂嗰度由上半幅牆到天花板,都染滿咗一滴滴飛濺上去嘅紅色液體;Crystal眉頭一皺,用手背揞住自己口鼻。

呢啲痕跡好明顯係有人喺度爆咗頭,我衝咗上去,見到樓梯頂對出天台地下都有大灘血喺哋下,但係唔似係爆開擴散性嗰種血漬。

天台電錶房…我暫時嘗試唔諗呢度發生咗啲咩事,搵番啲電話先。

雖然我轉身就見到電錶房,但係我再試用陳佩珊部電話打一次俾自己,聽唔到有聲。

我個心寒咗一寒,即刻衝過去電錶房嗰邊——頭先我唔知頭唔知路,一直想電話俾允仔;唔通頭先電話響嗰陣俾警察搵到,帶走咗?

「點?」Crystal見到我跑開,好似驚我走佬咁跟咗上嚟。

我一路都無收到線,就咁打開咗電錶房道鐵門,然後先終於聽到好微弱嘅鈴聲,沿住啲鈴聲搵番三部電話——我、楊悅盈同謝石俊嗰部——先至鬆番一口氣;好在呢道隔到音隔唔到訊號。

Crystal睇住我喺電錶房拎番三部電話出嚟,一面疑惑。

「我哋幾個交低咗部電話俾張允行,幾個人互相Send Message Keep住有訊息流動。」我收咗線之後袋埋陳佩珊個電話,又將楊悅盈同謝石俊個電話都放番落袋:「我唔知允仔會借我個Facebook做啲咁嘅嘢…」

「你真係唔知?」從Crystal表情我睇唔出佢信唔我。

但係我照樣點點頭——我真係唔知、甚至無預計過允仔會咁做…

我個電話有九個未接來電,六個係陳佩珊、三個係家姐打過嚟嘅;不過我第一時間係開番個Facebook Messenger同楊悅盈講呢件事。

一打開個Facebook Messenger,我見到除咗洪諾言之外,原來允仔仲用過我個Account企圖約徐建文同埋柯志恒出嚟。

 

Hei Yin Ho:

允仔拎咗我哋啲電話之後,偷用我Account約咗洪諾言出嚟

佢同洪諾言都死咗,而家啲同學話係我嘅陰謀嚟

但係佢哋唔知我有無死到,所以無人敢炸我          23:16

 

我同Crystal喺瀝源天台…如果你OK嘅話落一落嚟

因為如果Crystal喺個Group度講咗我無死…

我好快就會俾人炸Whatsapp…                23:17

 

Yuna Yeung:

唉…等我一陣              23:17

 

「阿言死咗…係咪代表徐建文死埋,呢個濕鳩遊戲就會完?」Crystal問。

我望住佢一陣,唔知點答。

「希望係…」我惟有咁答佢:「So Far Admin都只係加或者改規則,但係勝利條件完全無變更過。」

「Admin…真係柒輝嚟?」Crystal又問我一句。

「暫時睇嚟係…」——反正Admin都自認咗;成件事由頭到尾都唔可以用常理去解釋,所以你話有一個死咗嘅人用Whatsapp嚟殺死我啲同班同學,我而家都唔會覺得有咩奇怪。

講完之後我再用自己個電話Whatsapp俾周Sir:

 

Sorry…我趕唔切

記得喺謝石俊度拎番羅彥輝部電話                 23:21

 

一Whatsapp完無幾耐,我仲諗緊嘢嗰陣,部電話就響;我見到Crystal嚇咗一下。

 

家姐

來電

 

「喂?」其實我本身都諗住Send完個Whatsapp就打俾家姐。

「何晞賢?」佢把聲好似有啲唔肯定咁問。

「係呀。」

「頭先…頭先張允行用你部電話打俾我…」家姐似乎驚驚地:「你哋做咩呀?唔好拎我嚟玩好喎…」

「我…我夜啲番嚟再同你講。」

「你去咗邊?」

「我喺瀝源,頭先去咗阿Sir屋企。」

「無事吖嘛?你同張允行佢哋一齊。」

…我無出聲,靜咗一陣家姐先至再講嘢。

「我渣車過嚟接你?」

「千祈唔好。」我斬釘截鐵咁講:「街都唔好出,等我番嚟…」

我無等家姐覆,就Cut咗佢線;同時歎咗一口氣…

我唔知應該點同家姐解釋成件事好——Billy同允仔佢都識,而家佢哋兩個都死咗,我覺得自己對住家姐好難講個咩藉口蒙混過去。

然後喺我完全無心理準備嘅情況之下,Crystal襟住我膊頭好大力咁推,我失重心跌咗落地;佢跟住坐上嚟壓住我,車咗我一巴之後開始摷我褲袋。

我個袋裝住幾部電話,全部跌晒落地,Crystal部機貼滿啲珠片,一眼就認得出,所以佢一手就搶番部電話,兜口兜面影咗我一張相。

影完之後佢企番起身,調頭走開;我見佢一起步已經開咗個Whatsapp,所以知道今次無用,我連爬起身追上去嘅動力都無。

 

「何晞賢無死到呀!阿言同張允行都死咗!」          23:25

 

佢應該會連埋頭先我張相一齊Send上去,跟住可以想像啲懷疑我嘅同學會開始肆無忌憚咁炸我。

樂觀啲咁諗,起碼我自己拎番部機…同埋啲同學都已經所剩無幾…

我開咗自己個Whatsapp,準備迎接啲Incoming嘅Message…

眼尾見到又有一個少女衝番過嚟我度,起初以為Crystal諗住過嚟濕多我一嘢。

唔係,衝過嚟呢個係楊悅盈嚟——佢完全無理過我,埋嚟到一嘢跪咗喺我旁邊,執番起自己部電話,然後馬上開番個Group出嚟。

 

「而家已經就嚟End Game,

邊個Send Message過嚟炸何晞賢,

就一定係內鬼!」            23:26

 

楊悅盈Send完呢句語音出嚟之後,我見個Group入面本身輸入中嘅幾個同學都停咗手。

留言

    未有留言

分享