已讀不回死全家!

第30章 - 30 Unread Messages

一間只係放得落一張床、一個櫃、一張書枱嘅房入面。

洪諾言坐喺床邊,一路食煙一路喃喃自語。

痴撚線!

佢望住頭先俾佢掟咗落地、個Mon已經裂咗嘅電話,一邊提防住會唔會突然之間又收到Whatsapp,一邊不斷重覆呢句嘢。

痴撚線痴撚線!

除咗呢句嘢之外,已經諗唔到有咩可以講。

區家純條八婆唔知點解要屈佢——佢聽到何晞賢尋日話Keep住唔Send Message出去就唔會有事,佢簡直覺得何晞賢係自己救星——就算佢有幾蠢都好,都唔會意識唔到有份欺凌羅彥輝嘅自己好有可能係其中一個關鍵人物。

由幾個鐘頭之前Admin啲Message度得知,關鍵人物又少咗一個——佢知道就係尋日死咗嘅吳啟鋒。

佢唔知道Admin係點殺人、唔知可以點阻止,而對於身為關鍵人物嘅佢,惟一生存落去嘅方法就係成為最後生還者。

所以佢更加無可能會主動挑起火頭:洪諾言都不知幾想自己潛水,等啲同學圍攻徐建文,然後佢哋全部人一齊冚家剷,死淨佢自己同埋Crystal。

偏偏區家純喺呢個時候…

「屌你老母!」佢用力一拳揼落張床褥度,又嗌咗一聲。

「阿言…唔好咁啦…」坐喺床上面、眉頭深鎖嘅Crystal爬過嚟,從後攬住佢。

「屌你!我唔咁樣可以點樣呀?」洪諾言破口大罵,掙開咗Crystal。

佢阿爸係夜更的士司機,阿媽做酒樓樓面,兩個都係成日半夜先番嚟;所以每逢聖誕、暑假之類嘅長假期,佢都會晏晝就帶Crystal番屋企瘋狂做愛,夜晚再出街搵啲朋友玩或者去蒲。

但係最近——尤其是今日——唔好話出去玩,佢連掂條女嘅心情都無。

「不如你同啲同學講清楚?」Crystal唔放棄,再一次用手臂纏住洪諾言條頸;今次佢無掙扎,因為知道一陣Crystal一定會再一次攬番住佢。

「無撚用…我講乜都無撚用…」洪諾言手勢純熟咁一下將個煙頭彈出窗外面。

雖然柒輝幾乎係全班同學嘅欺凌對象,但係如果用食物鏈嚟比喻,柒輝只係食物鏈最底層;上面依然係有層次之分。

好不幸地(?),洪諾言一伙人往往係喺食物鏈最頂一層,平時蝦蝦霸霸,目中無人嘅佢哋,其實樹敵幾多佢哋自己心裏有數。

去到而家呢個時候,相信無人可以再完全理智客觀咁睇件事——啲同學一定係諗住:洪諾言平時係仆街,佢而家一定都係仆街,係要除之而後快嘅仆街。

「如果…搵何晞賢幫手呢…?」Crystal再問。

洪諾言伸手喺床上盒煙度又拎咗一枝出嚟,放喺嘴度點著佢;佢雖然同何晞賢無乜過節,但係亦都同佢呢種事不關己嘅書蟲同學無乜兩句…

「佢會幫我?」洪諾言反問:「佢可以點幫我?」

就連佢自己都諗到,自己係其中一個關鍵人物;口口聲聲正氣凜然話要大家一齊渡過難關嘅何晞賢,會唔會救番自己一命,然後由得全班同學繼續喺呢個遊戲入面?

忽然電話響咗一下,嚇到佢跌咗枝煙落地。

「屌你老母…」洪諾言又再細聲講一句,然後執番起個電話。

係何晞賢,佢Send咗個Facebook Message俾自己。

 

Hei Yin Ho:

點呀你?未死吖嘛?            20:07

 

平日嘅話洪諾言如果見到何晞賢咁同佢講,一定會即刻發火;但係而家反而好奇怪地覺得有少少溫暖。

 

Yin Hung:

未呀!屌你老母          20:08

 

喺身後面嘅Crystal見到何晞賢主動搵洪諾言,輕推咗佢一下;但係好快又見到何晞賢打緊字。

 

Hei Yin Ho:

我知道區家純條八婆改圖屈鳩你

但係你都見個Group入面啲同學開始唔信我,我而家講乜鳩都無撚用               20:09

不過你放心,單嘢唔會無得拆;我同允仔而家喺瀝源邨天台

你即刻過嚟當面傾,穩陣啲                   20:11

 

洪諾言爭啲感動到喊出嚟——估唔到何晞賢會主動提出幫佢;佢爭啲想覆番何晞賢一句:頭先誤會咗你,對唔撚住!

佢回頭望一望Crystal,見到佢都開始展露番個笑容;佢諗咗一諗,就覆番何晞賢。

 

Yin Hung:

等陣啦屌,而家過嚟呀!              20:13

 

***

 

去到瀝源邨商場嗰陣,洪諾言先發現原來佢唔知天台喺邊度上,所以佢打咗個電話俾何晞賢。

「喂。」接電話嘅係張允行。

「屌,何晞賢呢?」洪諾言問:「我唔知天台邊度上喎。」

「我同鳩賢喺天台,你到咗?」張允行同洪諾言講:「扭蛋機前面等我。」然後就收咗線。

洪諾言咁啱一入嚟嗰陣就見到一排扭蛋機,所以佢企咗喺嗰度等。無幾耐張允行就喺上面行咗落嚟,然後帶洪諾言行番出商場外面,再沿住一條樓梯向上行。

「何晞賢呢?」洪諾言再問多一次。

「喺上面呀,佢話淨係想同你單獨傾。」張允行語氣有啲不快,唔知係咪嫌何晞賢唔俾佢參與:「佢叫我帶到你上去就落番嚟。」

行到一樓嗰陣洪諾言喺褲袋拎咗盒煙出嚟,擺一枝入口點著咗;何晞賢俾佢嘅感覺係成日都同Billy、張允行形影不離,但係而家忽然間想同自己單獨見面,洪諾言覺得會唔會有啲咩內情,不禁有少少緊張。

「屌…好臭。」張允行用手喺面前不停撥:「食乜撚嘢煙…」

「嫌臭咪撚跟埋嚟。」洪諾言深深吸多一啖煙,然後終於望到再上多一層樓梯就係天台,所以佢指指上面問張允行:「佢喺上面?」

張允行點點頭,仍然相當不滿咁用手揞住鼻。

行上最後呢段樓梯嗰陣,洪諾言覺得氣氛開始有啲唔妥,所以好慶幸自己留咗個保險。

佢其實帶咗Crystal嚟,但係叫咗Crystal唔好露面,因為唔知何晞賢有無咩陰謀;如果30分鐘之後見唔到洪諾言番嚟收唔到佢電話,就上已讀不回死全家個Group度話何晞賢想暗算自己。

洪諾言將個煙頭丟落地,同時間有啲驚訝原來自己都有識得用腦嘅時候。

不過佢覺得自己有啲諗多咗,因為就算同何晞賢之間發生咩事,對住佢呢個——

洪諾言踏上最後一級樓梯嗰陣,覺得背後俾人打咗一拳;佢意識到俾人偷襲嗰下已經又再中多一拳。

轉身過嚟嗰陣,洪諾言腹部又俾對方擊中一下——佢忍痛揞住肚上面俾人打中個位。

一望,原來施襲者係張允行。

而且張允行用嘅唔係拳頭。

因為洪諾言見到,張允行手上唔知幾時多咗一把染滿血嘅刀仔。

「屌你老母!」洪諾言揮拳想打張允行;但係動作有啲慢,張允行輕輕向後一閃就避開咗。

洪諾言提防住持刀向住自己逐步逼近、眼神冰冷嘅張允行,慢慢向後退。

「痴撚線!屌你老母!做乜撚嘢?」洪諾言強忍住傷口嘅痛對住張允行大聲鬧。

佢揞住肚嗰隻手感覺非常之暖,因為佢自己新鮮溫熱嘅血不停由佢自己體內湧出嚟。

因為震驚,劇痛同埋失血,佢一個唔小心向後跌坐咗落地;張允行絲毫無猶豫,舉起刀撲咗去佢身上面。

留言

    未有留言

分享