已讀不回死全家!

第3章 - 3 Unread Messages

我同允仔挨住牆坐喺地下,Billy喺我哋面前踱嚟踱去。

 

有無人試過真係已讀不回完之後死咗?有嘅出句聲!              18:38

 

Billy喺已讀不回死全家入面問咗一句。如果俾著平時,我同允仔一定會笑佢問埋啲鳩問題,但係而家…

 

我哋咁樣Send要Send到幾時?            18:39

 

差唔多30分鐘,我又回覆咗允仔Whatsapp一次——坐喺我隔離嘅佢睇到個Message,苦笑咗一下。

「喂!都話唔好睇個Message住!」Billy見到允仔秒讀咗我個Message,即刻好大聲咁講。

「有乜分別啫…」允仔有氣無力咁答咗佢一句,然後繼續垂頭喪氣。

頭先跟警察番咗警署錄口供,叫咗Billy同允仔過嚟陪我,我哋大約五點左右離開,去番學校附近瀝源邨一個天台度坐咗差唔多兩個鐘,我同允仔就不斷咁互Send Message。

呢個天台平時係我哋嘅秘密基地,放學之後我唔使補習佢哋唔使練波嘅日子,都會上嚟呢度,吹下水,玩下啲無聊嘢,Hea到天黑先番屋企;抱住一個咁嘅心情上嚟秘密基地,我哋都係第一次。

「唔好睇個Message就無事!已讀不回死吖嘛,唔讀咪唔使死囉!」Billy大大聲咁對住允仔講。

「Billy哥…唔啱我Send個Message俾你試下?」我駁番一句。

「嚟吖!」

「挑!佢講吓啫!我同鳩賢係咪都Whatsapp吹水架啦,你理得我哋啫。」允仔打圓場講咗一句,我亦都暗自有啲唔好意思。

因為我哋都知道,如果我Send咗個Message俾Billy,佢真係會用自己嚟試不讀不回。

但係喺呢個階段…我哋都唔想身邊有任何人去冒險…

Billy似乎都有啲攰,於是喺我身邊坐低咗,我見佢不時入去已讀不回死全家個Group度睇個成員List。

仍然係剩28個同學,但係我心知肚明,Billy緊張嘅只係其中一個成員——周子筠。

Billy同子筠對於老師嚟講,簡直係天南地北兩個極端:一個成日上堂玩、嘈、搞事,另一個文靜、品學兼優、長年考第一;因此當Billy話俾我聽佢哋兩個拍緊拖嗰陣,我仲以為佢玩我。

我拍拍Billy膊頭,佢望一望我之後就行開咗,應該係打電話俾子筠。

「喂,鬼鬼鼠鼠去邊?」允仔見到Billy行開,即刻問咗句。

「理得佢吖…諗下我哋點算好過啦。」我求其同允仔咁講;無錯,就連允仔都唔知Billy拍緊拖。除咗當事人之外,全校得我一個知。

「頭先警察有無同你講過乜嘢?」允仔壓低聲線問。

「無,你旨意班垃圾可以同我講乜?」我諗起頭先啲警察,忍唔住苦笑咗出嚟。

我哋班有同學報咗警話學校死人,所以附近警署派咗兩個便衣過嚟——就係頭先喺醫療室外面同周Sir講嘢嘅人;我有時懷疑學校其實同警署係咪有傾過,每次都只可以派便衣嚟學校。

因為Elaine死嗰陣我就喺佢隔離,兩個阿Sir好快就要求我跟佢哋番警署「協助調查」;睇得電視多嘅我本身以為自己會係最大嫌疑嗰個,但係錄口供過程中,佢哋又無乜點為難我;反而係又要我重新回憶同埋描述成件事一次…有啲困難,所以用咗好多時間先搞掂份口供。

我無提過已讀不回死全家呢個Group,因為我只係講Elaine個頭爆開,個阿Sir已經用一個當我末期精神病咁嘅眼神望住我。

「聽啲同學講,黑車嚟嗰陣學校無開停車場道閘俾佢哋。啲救護員抬住Elaine兜咗好大個圈先番到上架車度。」允仔同我講;我相信佢係喺其他同班同學嘅Group嗰度睇番嚟。

呢個時候我電話忽然響——無錯,靜音咗咁多年,我終於開番個鈴聲——嚇咗我一跳。

 

家姐

來電

 

「喂…何晞媛…」我專登講家姐全名出嚟,允仔聽到精神為之一振。

「做乜呀?頭先係咁打俾我?」家姐啲語氣唔係好耐煩——我頭先喺警署打咗幾次電話俾佢,諗住叫佢嚟接我番屋企。

「無嘢喇,頭先俾人拉咗番差館諗住叫你過嚟接我——」

「我而家過嚟啦,你喺邊度?」佢問。

佢係聽唔清楚我話「俾人拉咗」,定係唔Care?

「瀝源邨。」

「好啦,我過到嚟再打俾你!」講完佢就收咗線,如果我無估錯佢應該係渣緊車。

「鳩賢,不如我今晚去你度瞓吖。」允仔笑笑口咁講:「咁咪可以一路吹水一路通宵Whatsapp囉,無咁易瞓著吖嘛!」

「無所謂呀,陣間叫我家姐車埋你。」我雖然知允仔心入面諗緊乜,但係我無踢爆佢,因為——

「喂,你地睇下個Group。」Billy突然走番過嚟大聲同我哋講,然後坐番喺我旁邊。

我同允仔即刻拎部電話出嚟,入去已讀不回死全家個Group度,見到Group頂顯示+852 6109 XXXX輸入中。

我哋三個不約而同咁等住佢Send Message出嚟,連呼吸聲都壓到好細。

 

大家好!關懷同學由Whatsapp做起!

讀後回覆是基本禮儀,已讀不回的人都去死吧!

本日因已讀不回而死的人數:0人

因Quit Group而死的人數:11人

剩餘人數:28人                   18:52

 

接下來是給6A班諸位的新規則!                  18:52

 

——新規則?

留言

    未有留言

分享