已讀不回死全家!

第29章 - 29 Unread Messages

「假圖。」唔知點解,楊悅盈望咗一眼之後就講。

我雖然唔知張圖真定假,但係有一個更大嘅問題。

 

@6A-區家純 咁你點解唔尋晚就同大家講?           15:48

 

呢個就係我心入面想問嘅問題。

但係喺Group度問出口嘅人係柯志恒。

 

@6A-柯志恒 我信唔過何晞賢!            15:48

 

洪諾言同佢女朋友,其中一個MK妹Crystal呢個時候都覆咗句:

 

痴撚線!唔好屈鳩我!                  15:48

 

我尋晚成晚同阿言一齊,佢乜都無做過                  15:49

 

然後洪諾言Send咗另一張Cap圖出嚟:佢同區家純個Chat Box係空白嘅。不過好快有同學——賴智勇——又插咗把口:

 

唔俾你Delete咗Message?            15:50

 

老實講,我覺得洪諾言如果意識到自己係關鍵人物,會咁做絕對唔出奇…

 

@6A-柯志恒 如果我哋照何晞賢個做法…一齊炸洪諾言

萬一佢死咗之後我哋唔知,繼續Send Message過去…               15:50

 

我…我唔知俾咩反應好——因為我無考慮過呢個情況…我一心只係諗住叫人完全唔好Send Message,然後用「俾全班一齊炸」呢一點令到無人敢背叛。

 

「屌你老母咩!」          15:50

 

洪諾言錄語音鬧咗一句,但係對件事無任何幫助,亦都暫時無人打算理佢。

用一個求助嘅眼神望向楊悅盈,但係佢同我一樣咁迷茫。

 

@您 講兩句?             15:51

 

張浩榮第一個問我,然後陸續有三四個同學都@我叫我解釋。

我惟有講:

 

對唔住…我無諗清楚…                  15:52

 

可以想像,如果而家係大家面對面喺課室嘅話,大部份同學都會「屌!」一聲嗌出嚟。

 

無諗清楚…你又同我哋講?                   15:52

 

咁…算唔算係你害死人?              15:52

 

有無人知邊個死咗?            15:53

 

仆街!你唔好再遲啲先講?

無料到咪撚扮大佬呀喂!              15:53

 

我唔想再睇個Group,所以放低咗部電話,垂低頭合埋眼…

 

「無嘢改變過,大家繼續唔好Send Message俾任何同學就OK。

區家純…如果你張圖係真嘅話,就要辛苦你繼續同洪諾言Whatsapp住先。」

 

楊悅盈咁樣講;我知佢對象唔係我,而係個Group:

 

「何晞賢同我已經有新發現,但係我哋唔會喺度講出嚟俾Admin知。

我哋好快會有新進展。」

 

我聽到個Group依然繼續響,我拎番起個電話想睇下啲同學講乜——但係楊悅盈捉住咗我唔俾我拎電話。

「…你…都係唔好睇好啲…」佢另一隻手拎走咗我個電話。

呢個時候先發覺,在場嘅幾個人都望住我,除咗允仔之外表情都有啲複雜;佢哋係咪開始懷疑我有無能力帶佢哋脫離遊戲?

「我——」

「咁大家就照分工咁去做嘢。」楊悅盈打斷咗我:「周Sir聽日同我去人哋公司度,謝石俊仔細Check下羅彥輝啲電話記錄,陳佩珊睇個Facebook Page。」

我苦笑咗一下——唔知點解開始連我都有啲懷疑自己。

其實由一開始我已經不自覺咁依賴緊楊悅盈,好似係…

「你…」楊悅盈轉過嚟對我講:「搵下有咩方法可以爆人頭。」

「咁我呢?」允仔問。

「你負責啲電話就得。」楊悅盈將我同佢自己部電話交咗俾允仔,謝石俊見到就照做。

「仲有,我頭先想問…」允仔繼續講:「而家其實係咪徐建文同洪諾言死埋…個遊戲就會完?」

「小心啲電話,經過頭先單嘢…」楊悅盈無答到,而係繼續俾指令佢:「我唔知會唔會有人癲起上嚟炸何晞賢或者我個Whatsapp。」

「如果你哋無其他問題…我想走先。」佢企咗起身,拎番起自己個袋:「我淨係喺自己屋企先可以認真做嘢。」

唔知佢咁講係咪想睇下有無人陪佢一齊走,但係我哋全部人都無任何動作——

「咁…我送你出去。」——除咗周Sir。

「我都走喇…」——同埋允仔之外;佢好快已經行咗去楊悅盈隔離:「我…我想番屋企先。一齊走啦,盈盈。」

楊悅盈一如以往咁無乜表情、無乜表示,但係就跟住周Sir同允仔一齊行咗去大門嗰邊。

允仔好似忽然間諗起啲乜嘢咁,回頭叫咗我一下。

「喂,鳩賢…」

我望住佢,見佢欲言又止咁樣。

「無嘢喇都係…聽日再同你講啦。」佢對住我咧嘴一笑,然後就同楊悅盈一齊走咗。

剩番我、陳佩珊同謝石俊喺度;我有啲洩氣,同時好想睇下個Group入面…啲同學會點樣話我。

「唔緊要…」陳佩珊好似Feel到我有啲唔妥,搭住我膊頭同我講:「我哋唔會懷疑你。」

謝石俊都同樣用個好堅定嘅眼神望住我點點頭,鼓勵番我。

「多謝你哋…」我拍一拍陳佩珊隻手,然後就拎起面前嗰疊紙——一大堆Facebook Post——開始睇。

留言

    未有留言

分享