已讀不回死全家!

第27章 - 2̥̙̠̓̀͋ͧ̋͂7̛͔̝̙̗͓̱͓ͤ̽̅̿̌̚ ͎̩̜͍̩ͯ͛ͨ̊̚Ṷ͚͔̱̓̂ͣ̽͌ͪn̟̻̺̄̈͐ͪ͛͒r̬̞͈̒̌ͣ̊ͦ́̄ͅḛ̳̄̊͗͂̐̒a̢͎ͥď̗̫̺̘ͯ ̛͚̦̱̙̙̩̿̍̈́ͨ̀̌M̤̯͕͔̗̿̾̐ͤ̌ͨ̑e͇̪̭͝s̛̮͒̉s̠̲̘̫̤a̝ͪg̼͖ͣ̌̆͋ͪ̈e̖̞̳̝̲̲̥̾ͤ͌ͣͫ̓s̺ͫ̇͊͛͊̐̅

同周Sir喺樓梯口度坐咗一陣,我先醒起:仆街我哋漏低咗楊悅盈喺入面。

想叫周Sir同我一齊番過去,但係佢竟然擰擰頭,仍然喺度自言自語咁鬧緊羅生;我惟有硬住頭皮行番過去。

我喺羅彥輝屋企門口踱嚟踱去,猶豫咗好耐——

羅生對周Sir咁大反應好明顯係因為周Sir姑息咗校園欺凌、拍片嗰件事,照咁睇…我…我應該安全?

羅彥輝俾人拍片當日我都喺度,仲袖手旁觀…如果羅生知道嘅話——

屌!但係我哋漏低咗楊悅盈喺入面!

不過佢應該比起我更加安全?話晒佢一直都有幫羅彥輝…

越諗我就越覺得自己無撚用:楊悅盈就係因為驚先至搵我哋上嚟陪佢。

——死就死啦!

我儲咗好耐氣,終於諗住襟鐘嗰陣,道門就打開咗,然後——楊悅盈就行咗出嚟,雖然見佢有少少面青,但係似乎無乜嘢。

「Uncle,咁我走先喇。」佢對坐喺梳化上面煲緊煙嘅羅生講。

「好,有時間就上嚟食個飯啦…」比起頭先狂暴化嘅羅生,佢而家溫和到好似鬼上身咁,見到我企喺門口仲同我揮手道別。

「仆街…漏低我一個喺入面…」楊悅盈閂埋咗門之後,打咗我心口一拳,之後就開始行過去樓梯口,我一面茫然咁跟上去。

「頭先…發生咗咩事?」我問佢:「羅生好似癲咗咁打柒周Sir又趕我哋走,我仲擔心你——」

「打佢就正常嘅。」楊悅盈一句說話打斷咗我;睇嚟佢對周Sir咁不滿嘅原因同羅生一樣,都係因為佢當時無幫到羅彥輝解決件事。

見到頹坐樓梯嘅周Sir,楊悅盈行埋去毫不客氣咁拍咗佢個頭一下。

「起身,搵個哋方坐低整理下頭先我搵到嘅嘢。」佢對住我同周Sir講:「最好唔好番學校,因為我想有個上網快啲嘅地方;但係我屋企太細。」

「我…我家姐喺屋企,如果傾已讀不回死全家嘅事,俾佢聽到就大鑊。」我都老老實實咁講:「如果周Sir你係一個人住嘅話…?」

我講完之後,同楊悅盈一齊望向周Sir,佢亦都好識做咁馬上點點頭。

「咁通知埋佢哋三個。」楊悅盈喺袋度拎番我部電話出嚟俾我;周Sir無等我哋指示,一早已經拎咗個電話出嚟打。

雖然允仔部電話喺楊悅盈度,但係我知佢屋企電話。

「喂?」接電話嘅人把聲比起允仔青澀少少,我知道呢個係佢細佬張兆行。

「行仔?你大佬呢?」

行仔無答我,但係隔咗幾十秒之後允仔就喺電話另一邊傳過嚟。

「喂,有啲嘢要傾,而家去周Sir屋企。」我同佢講。

「鳩賢?好呀,但我撚知周Sir住邊呀?」

「你地址係——」我拎開個電話對住周Sir問。

「大圍名城,我哋喺火車站F出口等。」佢大大聲咁答我。

「聽到?」我問番允仔。

「得,好快到…」允仔講完之後就收咗線。

我遞番部電話俾楊悅盈嗰陣,見到佢啱啱用Facebook Messenger約完謝石俊。

「我打咗俾佩珊。」周Sir主動同我哋講。

楊悅盈袋番埋啲電話之後就行咗過去電梯嗰邊,我同周Sir——已經開始習慣性咁——跟住佢尾。

 

***

 

我哋三個搭的士過去大圍,去到嗰時發現陳佩珊已經到咗;我唔知佢住邊,但係應該離呢度唔遠。

等允仔同謝石俊途中,我哋企咗喺個出口附近一個靠牆位置,楊悅盈坐咗落地下,喺袋入面拎咗一疊紙出嚟,我見到其中幾張係一個Facebook Page嘅Screen Cap;雖然有啲好奇,但係我見佢聚精會神咁喺度整理,我就無煩到佢。

企喺我左邊嘅陳佩珊俾個電話我睇:已讀不回死全家最新一個Message,Admin承認咗自己係羅彥輝。

「係咪真…?」陳佩珊問我。

「唔知…」我答佢;我唔係太想相信身邊會發生啲咁嘅「靈異」事件,但係自從呢件事…呢個遊戲開始以嚟,的確發生咗好多我常識範圍以內解釋唔到嘅事。

「如果你有時間…」坐喺地下嘅楊悅盈拎咗我個電話出嚟,開咗Facebook Search嘢:「可以睇睇呢個Page。」

佢遞個電話上嚟俾我,我彎低身接過之後,見到佢打開咗一個叫做LYFS嘅Page;陳佩珊有啲好奇咁挨咗過嚟,我用左手拎住部電話放過去同佢一齊睇。

「啊!」陳佩珊見到個Page,即刻問:「呢個就係Admin…羅彥輝個Page?」

楊悅盈點點頭。

個Page全部都係一啲好迷幻嘅電腦圖片,有啲我覺得似扭曲咗嘅風景畫,有啲就好似吸完毒之後見到嘅幻覺咁(當然只係我想像…我未吸過毒),全部都配一段俾堆亂碼遮住咗嘅字。

我拉到去個Page第一個Post——7月17號,Create Page當日出嘅,連圖都無,只係得一段字。

 

Hͯ̆̾͑̂̈́̓ͮ͛͋̽̾ͧ́͏̵̮̤̩̦̥̮̮̹̼͠Ȩ̵͈̻̭̺̪̣̠͈͖̞̫͍͕̫͈͓̏̓͗ͯ̊͋̃̂̈́͆ͅL̛͍̩̠̥̹͍̲̣̟̠͔̙̼̗͖̩͙̥ͭ̄͗ͬ̌ͪ͑ͬḶ̸̛̫̝̼͙͈͕̳̈́̓ͤ͂͌ͯͤͨ̓͗̾̈́̒ͣ̚͟͡Ǫ̷̸̞̰̱̝̟̠͈̪͇̫̜̼͚̅ͥ̃̿̌̃̓̀,̯̤͈̞̟͈͑͂̎̿̈ͮ̑ͪ́̿̇̑͒͗̅̂̚͝͝ ̡͓̰̱̙̭̟̼̪͈̳̯̖̑̓̾̉͆̃͆͝W̨͕̣̟̘̘͉̥̠̟̬͓̪̳̭͓̄ͨ͐ͬ̏̀͛̌͑̋̄ͮ̌̃̀͟O̫̥͌́ͦ̀̂̌ͯ̇͂͞͡ͅͅR̴̡̟̯̳̺̘̯͓̠̺̝̪͔ͫ̅ͫ̆̅̽͆̈́̀͐̇͛ͤͯ͛̆͛͟L̏́͗ͩ̆̃͂̇ͫ͂̌̃̂̏̚̚͏͏̦͚̥̤̹͙̀̕͞D͓̻͚̤͉̼̯͍̬̱̺̮̠̻̫̤̱̯̤̯̅̓ͮͪ̏ͨ͛ͩͫ͒̀̄̀

 

「Hello World…?」呢段字相對易啲睇,但係我唔明佢講緊乜;開Page記念?我忽然間諗起家姐去旅行,每次落機都會喺機場自拍貼上Facebook然後加一句「Hello, Tokyo!」。

陳佩珊皺起眉頭,似乎同我一樣唔知句嘢咩意思;佢不經不覺之間越哄越埋我度,令到我諗番起尋日喺課室攬住佢個感覺…

「係呢…」我乘機問佢:「尋晚我Facebook Messenger搵過你…唔見你覆嘅?」

「啊!我尋晚有啲攰…今朝瞓醒又唔記得咗覆你。」陳佩珊望住我,有啲唔好意思咁樣伸一伸脷:「Sorry…好在你唔係Whatsapp我啫。」

以前嘅陳佩珊對我嚟講係只可遠觀,但係我已經連續兩日同佢咁近距離接觸…我舉起右手想掃下佢啲頭髮。

俾佢一手隔開咗。

「喂!」周Sir忽然間出聲,我最初仲以為佢喂我,有啲心虛咁望過去。

原來允仔同謝石俊都到咗,周Sir叫緊佢哋過嚟;謝石俊對住我點一點頭,允仔…唔知點解好似有少少亢奮咁,一嘢走埋嚟我度用力搭住我膊頭。

「好,齊人。」楊悅盈望一望我哋幾個,收番埋疊嘢入袋之後企番起身對住周Sir下命令:「行。」

周Sir開始帶路,然後我哋幾個就跟住佢;允仔一直搭住我膊頭行,如果係平時我會覺得無乜嘢,但係而家…

「你做乜呀…」我忍唔住問佢:「High咗嘢?」

「痴撚線!」佢同我講:「咁知道你哋有發現吖嘛,就嚟解決件事,咪開心囉。」

「喂,盈盈,今晚輪到我好唔好?俾啲電話我今晚負責。」然後佢擰轉面同喺隊尾嘅楊悅盈講。

「呃…無所謂。」楊悅盈同佢講:「本身都諗住一係俾你一係俾謝石俊。」

允仔聽到之後,一面滿足,然後全程都無出過聲。

我哋跟住周Sir嚟到佢屋企樓下,入咗大堂——呢度果然係豪宅區,唔止管理員著住成套整齊西裝,連個大堂都霸氣過人;我直覺周Sir屋企應該幾有錢,因為如果無父幹,單靠佢教咗兩年書嘅人工,無乜可能買或者租得起呢度自己一個人住。

周Sir同管理員講咗兩句之後,就帶我哋去咗搭電梯。

留言

    未有留言

分享