已讀不回死全家!

第24章 - 24 Unread Messages

開門嘅係一個中年女人,同我記憶中嘅羅彥輝有幾分相似,應該就係佢阿媽。

「羅太…?」周Sir相當之凝重咁講:「我係羅彥輝班主任,我哋知道阿輝——」

「阿盈!」羅太望到我身後面嘅楊悅盈,好開心咁打斷咗周Sir:「今日又上嚟探輝仔?」

「係呀Auntie。」我見到楊悅盈好勉強咁笑住答,越嚟越用力咁捉住我。

「入嚟先啦。」羅太打開咗道門:「輝仔仲未瞓醒,你哋隨便坐。」

周Sir表情有啲狐疑,對住我用嘴形講咗句:未瞓醒?但係身後嘅楊悅盈推一推我,所以我就行咗入去。

「阿Sir你點稱呼?」羅太對住緊隨我入屋嘅周Sir問。

「我姓周,呢位叫何晞賢…」周Sir閂埋門之後就繼續講:「同埋楊悅盈——你尋日應該見過佢。」

「係呀係呀,輝仔成日提起阿盈架。」羅太好似好鍾意楊悅盈咁,相反楊悅盈好驚佢:「我老公今日放假,我煲多咗湯,我舀幾碗出嚟過你哋?」

我哋都仲未答佢,羅太已經行咗入去廚房。

楊悅盈見佢入咗廚房,好似鬆咗一口氣咁;我見佢執起門口隔離一對女裝嘅番學鞋放入自己個袋度,然後對住我同周Sir指一指梳化,之後就好熟架部咁打開其中一間房門入咗去。

我同周Sir行埋梳化度坐低,大家面上都係一副WTF嘅表情:雖然唔知發生緊咩事,但係羅太好明顯有啲唔正常;難怪楊悅盈要叫埋我先至敢再上嚟。

諗諗下,我有啲慶幸自己誤打誤撞嗌埋周Sir嚟,如果唔係我都唔知點算。

呢度細過我屋企好多,而且其中一間房——楊悅盈頭先入去嗰間——好明顯係自己裝修間出嚟,佔咗個廳一部份;周Sir用手背拍一拍我,指向角落一個神位。

我望過去,忍唔住個心又再寒一寒。

神位上面除咗擺咗個關公像之外,仲有一張黑白相,雖然距離有啲遠,但係相中人就係羅彥輝;相前面個香爐仲插住三枝已經燒咗一半嘅香。

全屋都好靜,惟獨是廚房入面傳嚟啲碗碗碟碟嘅乒乓聲、同埋羅太好輕快咁哼歌,搞到我同周Sir唔敢出聲;我好想用電話打字或者Whatsapp同周Sir講嘢,但係醒起部電話喺楊悅盈度。

——乜撚嘢呀?我做口型同周Sir講。

周Sir聳一聳膊頭,似乎同我一樣好緊張;緊張到唔記得咗叫我唔好講粗口。

「呃…Auntie?」我鼓起勇氣提高聲線問:「尋日除咗阿盈之外,仲有無同學嚟過?」

「有呀,你哋班長上咗嚟拎啲功課俾輝仔。」羅太喺廚房入面答我。

我哋兩個班長,一個係Elaine,無可能尋日會上到嚟;另一個係由做班會主席嘅Billy兼任,尋日呢個時間佢應該去緊我屋企。羅太指嘅班長應該係——

「柯志恒。」我細細聲同周Sir講:「我喺樓下見到佢個登記。」

雖然柯志恒係一條仆街,但係無可否認佢係有啲腦;早過我哋諗到羅彥輝有可疑絕對唔出奇。

上到嚟之後,佢應該好快就發現羅彥輝死咗,然後扮到若無其事咁番學校,若無其事咁同Billy一齊指控羅彥輝同楊悅盈;點解佢要咁做,我只係諗到一個可能性。

 

勝利條件:

2. 6A班倖存者兩人或以下!

 

我無任何實質證據,但係睇嚟柯志恒係想成為最後倖存者,所以佢先明知Send Message俾羅彥輝會死,都咁落力煽動大家去做。

羅太拎住兩碗湯行出嚟嗰時,門外面有鎖匙聲;我同周Sir接過碗湯之後,道門就開咗。

一個同羅太差唔多年紀、黑黑實實嘅中年男人,拎住一個超級市場嘅膠袋行咗入嚟,見到我同周Sir喺度眉頭向上揚咗一下。

「你邊位?」男人一邊將個袋放落地,一邊唔係太友善咁對住我哋——我覺得其實係周Sir——問。

「阿羅生係咪?」周Sir發現個男人似乎係正常人,即刻好似皇天大赦咁企咗起身:「我係羅彥輝班主任,呢位係——」

「老婆你番入房先。」男人——羅生擠出一個笑容,用一把同佢外型唔係好夾嘅溫柔聲線同羅太講:「我招呼周Sir得喇,你抖一陣夜啲煮飯。」

羅太出奇地聽話,馬上行過去另一間房嗰度,經過羅彥輝房門仲不忘敲一敲門講咗句。

「輝仔…阿盈上咗嚟,你瞓醒出嚟陪下人啦。」

等到羅太入咗房閂埋門,羅生就慢慢行去周Sir面前;呢個時候露台嗰邊射入嚟嘅光照到佢塊面,我先見到羅生原來好憔悴,但係眼神相當兇狠。

周Sir唔知係無留意定係點樣,佢向羅生行前一步伸出手,想同佢握手示好;羅生亦都舉起咗佢右手——

啪!

——一巴車咗落周Sir度。

睇羅生體格,我估佢一係做開Gym,一係做開地盤之類嘅粗重工作——當然後者機會比較大;嗰一巴車到周Sir爭啲企唔穩。

「屌你老母你好意思話係人班主任?」羅生好大聲咁鬧出嚟:「屌你老母!」

「羅生你冷靜啲先…」周Sir揞住左邊面:「你聽下我解釋先啦…」

羅生又舉起右手想打落去,周Sir狼瘡後退咗兩步,爭少少失足跌低;然後羅生轉向我。

「你又係邊撚個?」佢指住我好大聲咁問。

「我…我叫何晞賢,我係阿輝同學…」我Feel到自己驚到有啲震:如果佢用頭先個力度車我一巴,我可能成個頭都會俾佢打甩。

但係羅生聽到之後就無再啫住我,反而指番住周Sir繼續鬧。

「冚家剷你為人師表,我個仔有事嗰陣你唔幫佢?」羅生把聲依然好雄壯,但係似乎有啲哽咽:「我個仔死咗你哋知唔知呀?」

周Sir居然搖搖頭。

「我今次上嚟…就係想搞清楚呢件事。」好似嫌唔夠衰咁,佢仲要補咗一句。

「我個仔喺學校俾人蝦,有晒證據;你哋唔撚踢晒班仆街仔走不特止——」羅生上前扯住周Sir衫領,大力到我見到周Sir件恤衫最頂粒鈕甩咗出嚟:「——到佢退咗學番嚟,你哋都無人理過佢!佢死撚咗你哋都唔知呀,屌你老母!」

然後羅生再車多周Sir一巴之後,扯住佢件衫拉住佢行,打開門出咗去;我雖然好驚,又幫唔到周Sir手,但係都跟咗上去。

羅生襟住周Sir喺門口對出嗰條欄杆,指住下面個天井。

「阿輝就喺度跳落去死嘅,你想搞清楚吖嘛?而家好撚清楚啦!」然後佢終於放開咗周Sir:「走!唔好俾我再見到你!」

「跟撚著啲咁嘅阿Sir,遲早冚家剷架;轉校把啦。」羅生行番入屋之後對住我補多句——我竟然覺得佢語氣有少少苦口婆心——然後用力轟埋咗道門。

周Sir無端端俾人打咗兩巴,但係佢望落唔係嬲或者驚,而係有啲無奈、又有啲無辜;隔離左右鄰居聽到頭先咁嘈,好多都走咗出嚟隔住道鐵閘,一路對住呢邊指指點點一路竊竊私語。

「我哋行埋一邊先…」周Sir細細聲同我講,然後急步走過去樓梯嗰邊。

我驚魂未定,所以即刻跟住佢,同時聽到佢細細聲不斷咁講:痴撚線,成家都痴撚線!

硬係好似忘記咗啲嘢咁,但係頭先被羅生羅太連續嚇親兩次,加上隔離鄰舍一直望住我哋,搞到我而家只係想快啲離開呢度…

留言

    未有留言

分享