已讀不回死全家!

第23章 - 23 Unread Messages

我十二點幾已經去到禾輋邨,反正我無得瞓,所以好早就出咗門口。

喺商場麥當勞求其叫咗個九件麥樂雞餐,搵個位坐低,然後就通知楊悅盈。

 

Hei Yin Ho:

我到咗喇,喺麥當勞等                  12:23

 

本身諗住一路食一路等佢覆,但係佢好快就覆番我。

 

Yuna Yeung:

我而家行過嚟              12:26

 

——咁都好啲。我心諗,起碼我可以喺度瞓一陣,因為我已經開始有啲迷…

點知呢個時候電話忽然響,幫我醒一醒神;我喺袋搵咗啲機出嚟,原來係周Sir打俾楊悅盈。

「喂。」我幫佢接咗個電話。

「喂?呃…唔該楊悅盈喺唔喺度?」周Sir唔認得我把聲,可能以為我係楊悅盈阿哥。

「周Sir,我係何晞賢,佢交低咗部電話俾我。」

「哦,尋晚聽佩珊講你哋今日會去羅彥輝屋企?」周Sir都無等我答佢,就已經講:「我驚你哋有危險,等埋我一齊先。」

「我而家喺禾輋邨麥當勞,約咗楊悅盈兩點。」我知道楊悅盈因為某啲原因唔鍾意周Sir,但係有個大人跟埋一齊嘅話我真係求之不得,所以叫咗佢嚟。

周Sir收咗線之後,我拎埋另外三部電話出嚟:輪到用我自己嗰部Send嘢俾允仔、同埋楊悅盈嗰部Send嘢俾謝石俊;我成晚都好自律咁無睇過佢哋電話入面任何其他嘢,但係有啲好奇如果自己拎住嘅係陳佩珊部電話,又忍唔忍得到手…

——睇戲睇電視成日都會發生啲男女主角身陷險境,脫險之後就變咗情侶嘅情節;雖然老套到仆街…但係希望可以發生喺我身上。

我忍唔住合埋眼,用雙手拍拍自己塊面:而家唔係諗呢啲嘢嘅時候…醒下…

「好攰呀?就嚟瞓著嗱?」

楊悅盈把聲喺我後面傳過嚟,我擰轉頭望過去:佢今日紮起咗頭髮,著住件有啲殘嘅淺藍色T-shirt、白色短褲、白色布鞋,拎住平時番學用嗰個米黃色單肩書包,加埋佢本身已經無乜血色嘅膚色,成個人淺色到好似會反光咁。

「成晚無瞓玩電話,話唔攰就假。」我醒起原來我係第一次見到唔係著校服嘅佢。

佢行埋嚟坐咗喺我隔離,二話不說就拎咗我一條薯條擺入口。

「無著校服爭啲唔認得你…」我嗱嗱聲將四個電話推去佢面前:「快啲接手,俾我恰一陣…」

「一陣上到去,你幫我陪羅太傾下計食下飯,我想再入羅彥輝間房睇下。」楊悅盈好似當啲電話無到咁,反而繼續食我啲嘢。

「好呀…傾下計咁啦…」我忍唔住伏咗喺枱面:「係喎…我叫咗周Sir嚟——」

「周Sir?」佢有啲激動咁打斷咗我句嘢。

「周Sir。」我合埋眼繼續講:「多個人多雙筷…安全啲…」

雖然聽到楊悅盈繼續講嘢。

但係我個腦已經處理唔到佢講啲乜嘢…

好快就瞓著咗…

 

***

 

「醒!」

忽然間一隻好凍嘅手辣落我塊面度,我即刻醒咗;請我食凍柑嘅係楊悅盈,唔知係咪因為冷氣凍,佢著咗件淺藍色嘅連帽外套。

我坐番起身伸懶腰嗰陣見到周Sir啱啱喺我對面坐低,同我哋打咗聲招呼。

我見枱面濕咗少少,原來我瞓到流晒口水;我有啲唔好意思,拎咗張紙巾偷偷地抹番佢。

「係呢…阿Sir…」我問周Sir嘢想引開佢哋注意:「你幾時知道已讀不回死全家呢件事?」

「第一日嗰時佩珊已經話咗俾我聽。」周Sir雙手疊埋放喺枱面:「我一直都知道啲Rules,唔會亂嚟,你哋放心。」

「你一直都知道,但係乜嘢都無做過?」楊悅盈有啲唔客氣咁問;周Sir苦笑住,輪流交替望下我同楊悅盈,好似喺度表示緊「我又可以做啲乜嘢?」咁樣。

「一陣間上到去,你同呢條友一齊陪下羅太啦。」楊悅盈面向住我,指住周Sir講。

「咦…得你哋兩個?」周Sir有啲好奇,問楊悅盈:「我以為你會搵埋柯志恒。」

——唔好玩我啦,你尋日見到我點對柯志恒架?我心入面咁講。

「點解係柯志恒?」楊悅盈都問番佢。

「尋日你嚟搵我之前,柯志恒都問我拎咗羅彥輝屋企地址;我以為你哋兩個會一齊去搵佢。」

楊悅盈皺起眉頭同我對望咗一眼,我覺得佢同我諗緊同一樣嘢。

「柯志恒再問你啲乜嘢你都唔好理佢。」楊悅盈用命令式嘅口吻同周Sir講:「我唔知佢想點,但係佢一定係不安好心。」

楊悅盈好似對柯志恒都好有戒心咁,唔知係咪因為尋晚佢喺門外面聽到我同全班同學講嘅嘢?

「執埋啲嘢就行。」楊悅盈拎番自己個袋,企起身行咗去;我同周Sir都好聽話咁跟住佢。

行過去羅彥輝屋企途中,我哋都見到好多同自己差唔多年紀嘅人,應該係落嚟買嘢準備大後日開學;有幾個係我哋學校低Form同學,見到周Sir同佢打招呼,周Sir都禮貌咁回應番佢哋。

楊悅盈帶我哋行到去一橦井型公屋,穿過天井行去大門口嗰時,我諗起羅彥輝係跳樓自殺,好可能當時就係伏屍喺呢度,當堂有少少寒意。

大門無閂到,楊悅盈施施然咁行入去,仲同看更打咗聲招呼,但係我同周Sir就俾看更截住咗。

「喂!先生,先生!」看更係個阿伯,又瘦又黑,戴住副鋼框嘅老花眼鏡,喺管理處伸手出嚟截住我同周Sir:「去幾樓?搵邊位?身份證登記!」

楊悅盈無講乜嘢,淨係繞起手企埋一邊睇住。

「去904搵姓羅嘅;我係隔離蔡明磊紀念中學嘅老師。」周Sir惟有停低,喺銀包拎咗身份證同張教職員證出嚟遞俾看更:「我同兩個學生過嚟做家訪。」

看更拎咗周Sir兩張證,拉低副眼鏡眼,然後又上下打量下周Sir同我,之後先開始喺枱面本簿度寫嘢。

「呢度簽名。」佢將本簿放去周Sir面前,指住其中一個空格。

周Sir拎番兩張證、簽名嗰陣,我專登望下本登記簿:雖然阿伯啲字好潦,但係總算搵到我想睇嘅嘢。

尋日嘅登記人入面有柯志恒,佢14:49入嚟,都係上去904。

周Sir唔知我睇緊,所以佢簽完名就推番本簿過去俾阿伯,阿伯亦都好快收番埋本簿。

然後一直由上樓到去到羅彥輝屋企門口,我都俾一個問題纏繞住:點解柯志恒要咁做?

佢尋日先問周Sir羅彥輝地址,即係佢九成係為咗已讀不回死全家呢件事先過嚟;有登記到,即係佢已經上過去。

頭先喺麥當勞,周Sir提到柯志恒問佢拎地址嗰陣,我已經開始懷疑:柯志恒尋日已經知道羅彥輝死咗。

即係話佢尋日係蓄意引人Send Message俾羅彥輝整死Billy佢哋。

直覺話我知柯志恒唔係Admin:如果係嘅話佢大可以不斷收窄規則,等我哋自己死,唔需要做啲會惹人懷疑(實際上亦都令到我意識到佢圖謀不軌)嘅多餘舉動。

我嘗試諗佢究竟有咩用意,但係諗嚟諗去似乎都只係得一個解釋——

我感覺到自己手臂俾啲嘢捉住。

原來我一邊諗嘢一邊行,已經嚟到904門口;頭先沿路一直行喺頭嘅楊悅盈唔知點解龜縮咗去我後面,淨係突咗半個身出嚟,仲捉住我隻手。

周Sir望一望我哋,然後就襟咗門鐘。

留言

    未有留言

分享