已讀不回死全家!

第22章 - 22 Unread Messages

番到瀝源邨之後,楊悅盈叫我喺樓下等一陣;佢番咗上樓。

我挨埋牆邊企,喺書包入面拎咗謝石俊部電話出嚟打開咗佢個Whatsapp。

 

謝石俊今日有份逼死自己班嘅同學

作為補償,無論係乜嘢事,佢都要盡力幫手          21:39

 

呢個係謝石俊用楊悅盈電話Send俾自己嘅Whatsapp;就咁望落去,就好似係楊悅盈怪責緊佢咁。

謝石俊的確喺柯志恒煽動大家嗰陣爭少少就變咗第11個死者。我諗番起佢今日幫手搬同學過隔離課室、主動請纓做白老鼠Read Message,甚至開班會嗰陣不停咁發問,似乎都係因為佢都好逼切想完咗呢個遊戲佢。

我望下而家個時間:22:03——係時候要覆。

 

今日嘅事唔係你嘅錯,要怪就只好怪Admin同埋柯志恒

我哋而家開始一齊努力啦              22:03

 

其實呢啲鼓勵嘅說話我覺得有啲肉麻…但係嘅然Admin唔俾我哋Hea覆,我就即管咁樣寫。

希望輪到謝石俊Send Message嗰陣,佢會拉番上嚟睇。

大約十幾分鐘之後楊悅盈落番嚟,拎咗一件舊嘅男裝外套俾我。

而家農曆七月,我成身都係乾咗嘅暗紅色血漬,表情仲要(可以想像得到)陰沉中帶點兇狠;佢應該係怕我番屋企嗰陣唔小心嚇死人。

「我阿哥嘅,佢搬咗入大學宿舍之後留低咗好多衫。」楊悅盈見我望住件外套個表情之後,主動同我解釋。

我著起咗件衫,同佢講聲唔該之後諗住走。

「聽日下晝兩點,禾輋邨等。」楊悅盈同我講咗句;我點點頭之後就轉身離開咗。

落番瀝源商場,我去咗便利店買咗袋麵包同枝咖啡;雖然無乜胃口,但係我醒起原來我由下晝開始到而家一滴水都無飲過。

用八達通俾完錢之後,我拎住啲嘢食行樓梯上天台——我諗住喺天台坐下,等到十一二點再慢慢行番屋企。

雖然我父母去咗旅行仲未番,我都唔想而家咁樣番到屋企俾家姐見到:嚇親佢固然唔好,但係我最怕係佢追問我發生咩事;雖然我哋兩個姊弟感情唔係特別好,但係由細到大,我都好少有嘢會瞞住佢。

每行上一級樓梯,我都會諗番起以前我、Billy同允仔三條友喺天台度發生嘅事:放學上嚟問我借功課抄、三個玩互閹、自己試可樂溝萬樂珠、傾下學校有咩女…

上到天台,我轉個角諗住去番我哋平時坐開嗰個位——發現已經有人坐咗喺嗰度。

「啊?」坐咗喺度發呆嘅允仔見到我,有啲驚訝:「我本身諗住叫你上嚟坐下,但係我部電話喺你度。」

我丟咗袋麵包俾佢,然後喺佢隔離坐低,擰開咗枝咖啡;允仔拆開個袋撕咗半個麵包俾我。

「聽日幾點陪阿嫂去柒輝屋企?」允仔強擠出一個笑容問我。

「我嫂你老母,呢兩日之前我同佢無講過嘢咁滯。」我批咗佢一踭:「聽日兩點…希望到時發現到啲新嘢。」

「其實點解仲要去?」允仔面上個笑容消失咗,語氣一轉。

「咩意思?」

「Billy今日咪自己講咗:佢同徐建文、劉楚恒、洪諾言就係關鍵人物。」佢將手上拎住嘅麵包用力一撕搣開兩邊:「反正Billy同劉楚恒都已經死咗,我哋去殺埋徐建文同洪諾言咪得。」

唔敢相信允仔竟然會咁講。

「我屌你講笑定痴撚咗線?」

我皺起眉望住佢,佢個表情變得好冷漠,將手上嘅半舊麵包塞入口。

佢吞咗口入面啲嘢之後,又再擠番一個笑容出嚟。

「屌你梗係講笑,殺人俾差佬拉架嘛。」然後我聽到佢細細聲補咗一句:「雖然Admin話唔干預啫…」

頭先佢啲語氣唔似講笑…但係我無深究落去。

 

***

 

打開屋企門嗰陣,仲聽到有電視聲;我心諗仆街,家姐仲喺廳睇緊電視。

小心翼翼行入去,見到佢攤喺梳化度瞓著咗,我先鬆咗一口氣;番入房換咗衫之後,我幫家姐熄咗電視,之後就用垃圾袋裝起自己套校服拎咗出樓梯。

沖完涼之後,我瞓咗落床。

拎住個電話猶豫咗好耐。

終於決定打俾陳佩珊。

「嘟嘟…嘟嘟…」

通咗。

我有啲緊張;因為我未試過打電話俾佢。

但係一路嘟到斷線,佢都無聽到;可能佢瞓咗、或者沖緊涼?

打開個Facebook Messenger,搵咗佢Facebook——Rita Chan Pui Shan——見佢著緊綠燈On緊Line,就Send咗個Message俾佢。

 

Hei Yin Ho:

番到屋企未呀?早啲休息下啦

有我同楊悅盈喺度,大家都唔會有事,唔使怕                0:17

 

好似講得有啲誇張咁。

 

如果你想搵你傾下計,就打俾我啦                 0:17

 

然後我見到Messenger右下角好快出現咗個藍剔,Seen 0:17。

但係一直都無覆到我。

無幾耐,粒綠燈就唔見咗——佢Off咗Line。

我熄咗個Mon,苦笑咗一下。

雖然發生咗咁多事之後咁樣諗有啲唔Appropriate…

但係俾人——尤其是自己鍾意嘅女仔——已讀不回,其實個感覺真係幾難受。

留言

    未有留言

分享