已讀不回死全家!

第18章 - 18 Unread Messages

5B班課室閂埋咗門,但係開番燈;我透過門上面塊玻璃望入去,大部份同學都已經恢復番清醒,但係裏面仍然係一片死氣沉沉,周Sir坐咗喺老師枱度,耷低頭望住自己隻手,好似好攰咁。

同頭先班會嗰陣群情洶湧嘅氣氛完全相反,不過我知道佢哋對楊悅盈一定仍然懷有敵意,因為唔係個個同學都聽到我用Billy手機播出嚟、楊悅盈話羅彥輝已經死咗嘅嗰條Audio Note。

而且生還嘅人當中,分分鐘有人會因為頭先佢用過羅彥輝個Whatsapp、之後Send Message俾羅彥輝嘅人全部爆頭死,而認定羅彥輝同佢就係Admin。

依稀記得以前家姐借過一本書俾我睇,裏面有提過16世紀歐洲嘅獵巫行動;套入我哋而家嘅處境,楊悅盈就係我哋班嘅女巫。獵巫嘅群眾係出於未知同埋恐懼先至想燒死女巫,所以對佢哋講道理其實一啲用都無。

只要拎走佢哋嘅武器就得。

「你…都係企喺呢度等一等我。」我同楊悅盈講:「我叫你先好入嚟。」

我見楊悅盈開口好似想講嘢咁,即刻放咗隻手指喺嘴唇前面做咗個「噓」嘅動作。

「你唔想死就乖乖地等我一陣,鬼叫你頭先用咗羅彥輝部電話語音Whatsapp俾Billy。」

楊悅盈無話可說,於是挨咗喺牆度;我好小心咁打開門之後行咗入去,周Sir同埋成班同學都不約而同咁望住我。

「Sorry阿Sir,漏低咗部電話。」我拎住自己部電話同佢講。

周Sir點點頭。

「坐低先,我已經報咗警,同埋叫咗其他同學番晒嚟。」佢用手掌指向佢面前、陳佩珊隔離嗰個空位示意我坐低。

報警?

周Sir阻止我打柯志恒嗰陣講得出Admin,即係佢已經知道已讀不回死全家嘅事;咁佢無理由唔知再牽連其他人入嚟會害死佢哋?

但係我無理咁多。

「俾我講啲嘢先。」而家最緊要係保護咗楊悅盈先;所我走到周Sir身邊、面對住全班。

以前嘅我好安於縮喺後邊角落頭個位,與世無爭嘅日子,我發夢都估唔到自己有一日竟然會主動走出嚟同大家講嘢。

全班人、包括周Sir在內,都木無表情,好似喪屍咁望住我;惟獨是柯志恒嘅眼神,好似想殺死我咁。

因為而家課室著番燈,我呢個時候先留意到坐喺課室後面一角嘅五個人套校服仍然係白色一片好乾淨:MK五人眾原來喺我醒番之前已經番咗嚟;雖然無目擊到頭先死人嘅場面,但係已經知道發生咗咩事嘅佢哋完全無咗平時嗰種囂屎臭串格。

——對唔住喇。我心入面向佢哋五個人,尤其是徐建文同洪諾言講咗一句。跟住吸咗一啖氣,慢慢呼番出嚟。

「我有啲新發現想話俾大家聽;但係喺開始之前我想你哋先將部電話交出嚟。」

無人有任何表示、講任何嘢、甚至乎俾任何反應。

「全部人都要,如果你哋唔信我,就交俾周Sir。」

講完之後,我就喺課室靠窗個角落嘅電腦枱下面拎咗個空紙箱出嚟,當住全班面將自己部電話擺咗入去,然後將個箱交俾周Sir。

周Sir皺起眉頭望住我,一面疑惑,但係我無對佢作出任何解釋。

同學仍然文風不動,好似根本就聽唔到我講乜嘢咁——

不過,坐咗去後排嘅允仔已經起咗身,行緊出嚟;坐喺第一排陳佩珊亦都拎咗部電話遞俾我。

我接過允仔同陳佩珊部電話,放入周Sir手上面個箱度。

允仔交咗個電話俾我之後無行番埋位,而係企喺我隔離,用一個好認真嘅語氣對全班講。

「頭先如果唔係何晞賢,死嘅人一定唔止10個。」允仔指指自己,傻笑一下:「會係11個。」

「…12個…」陳佩珊雖然無企起身,但係都舉起手回頭過去對住全班人講。

跟住,啲同學一個接一個咁,開始拎自己部電話出嚟,周Sir好似等待指示咁望過嚟我度。

「唔該阿Sir。」

周Sir就開始沿住枱之間嘅通道行,一邊收集同學嘅電話。

「我嗰部仲喺隔離!」柯志恒好大聲,但係有啲口齒不清咁講,跟住即刻企起身想行出嚟。

我雖然一萬個唔情願,但係與其俾人發現我收埋佢部電話,不如我自己拎番出嚟;而家最重要就係避免自己都變埋眾矢之的。

「你坐撚番低!」我指住佢嚟鬧,同時喺袋拎番佢部機出嚟放喺老師枱上面:「我頭先喺隔離執到你部電話,你唔使過去!」

「咪行過嚟呀仆街。」我旁邊嘅允仔都對柯志恒好有敵意;睇嚟佢都意識到某程度上害死Billy嘅係柯志恒。

比想像中順利,周Sir收晒全班嘅電話,拎住個箱行番出嚟,佢亦都好適做咁樣自己抱住個箱坐番喺老師枱,而唔係交個箱俾我。

咁樣,至少佢哋唔可以因為一時衝動而再一次起哄用Message嚟炸楊悅盈;不過望一望柯志恒之後,我想試下再去盡啲。

「首先我想講…如果你哋再係咁樣…盲目地亂咁行動,係唔會有咩進展,反而…」我諗起一個鐘頭前仍然生龍活虎嘅Billy:「反而會不明不白咁害死其他同學,甚至乎自己。」

有啲同學聽到之後垂低頭。

「仲有就係,柯志恒呢個人相當有嫌疑。」我直言不諱,指住佢嚟講:「佢係第一個借勢煽動你哋用Message炸羅彥輝嘅人、仲爭啲害死你哋嘅人;但係而家佢無事不特止,我仲見到佢趁大家…趁出咗事嗰時想Send Message俾楊悅盈。」

「佢用咗羅彥輝部電話!如果羅彥輝真係已經死咗,咁一定係楊悅盈——」柯志恒想反駁。

「雖然唔知點解,但係我勸大家千祈唔好相信柯志恒。」我提高音量蓋過佢把聲——而家唔需要講道理,只要推另一個女巫出嚟俾人狩獵就得。

感覺到班上面唔少視線開始射向柯志恒,成日都胸有成竹咁款嘅佢都不禁開始怯;見到佢呢個樣我好心涼。

就算一陣有同學情緒失控,衝過去殺死佢,我諗我都唔會有咩不快。

「至於點解楊悅盈可以用到羅彥輝部電話,不如等佢自己解釋下。」

就當我諗住喺呢個時候開門帶楊悅盈入嚟嗰陣,佢就自己走咗入課室,身後面跟住兩個男人。

兩個男人就係上次嚟過學校嘅便衣警察。

留言

    未有留言

分享