已讀不回死全家!

第17章 - 17 Unread Messages

我恢復番意識嗰陣,一擘大眼就發現自己仍然挨住牆坐喺地下,但係位置唔同咗,而且地下…地下無晒血。

陳佩珊就喺我旁邊,抱住自己膝頭同我並肩咁坐,個頭側靠喺自己腿上面望住我。佢心情好似仲未平伏到、雙眼有啲紅腫,頭髮望落去仍然濕濕地,黐立立咁;但係佢已經洗乾淨塊面,著咗件深藍色冷衫遮住染滿血嘅上半身。

我身上面啲血漬都開始乾,件衫黐住自己個身,好唔舒服。

四圍望一下,見到個壁報板我先至知原來我哋喺5B班課室;呢度除咗我同陳佩珊兩個之外,仲有十個同學,有啲仍然暈咗未醒——譬如柯志恒:佢坐咗喺角落地下度。

等佢醒番之後,我仲要同佢算帳。

「你…無事吖嘛?」陳佩珊見我醒番,好溫柔咁問我。

我搖搖頭。

「頭先…唔該晒…」佢有啲怕醜咁同我講。

「…唔使客氣。」

的而且確,如果我頭先阻止唔到陳佩珊…同埋允仔…Send Message去羅彥輝Whatsapp嘅話,佢哋兩個而家已經…

「其他人…?」我見允仔唔喺度,所以問陳佩珊:「張允行呢?」

「同周Sir、謝石俊一齊…周Sir叫我哋過嚟呢邊先…佢哋三個…再將你哋暈咗嘅…一個一個咁扶過嚟…」

我知允仔當咗Billy係親生大佬咁,諗起佢頭先個崩潰樣,我好擔心佢;所以聽到陳佩珊話佢幫手送緊啲同學過嚟,我有啲出奇不意。

唔知係咪挨住牆挨太耐,我背脊有啲痛;所以我爬咗起身,行過去最近嘅一個空位度想坐低。

陳佩珊都企番起身,整理一下條校裙之後就跟住我。

「頭先…你點知道唔可以Send個Message出去?」佢細細聲問我。

「我唔知,只不過唔想大家因為一時起哄,將個茅頭指向一個唔知係唔係無辜嘅人度。」我發自內心咁同陳佩珊講:「我唔想再見到有人死。」

我拉開張櫈想坐低嗰陣醒起一件事——即刻轉身走過去柯志恒度。

陳佩珊呆下呆下咁又跟住我。

柯志恒左邊面又腫又瘀;諗起呢條撚樣唔知咩居心,煽動大家用 Message炸羅彥輝但係自己無做,仲喺其他人死咗之後想Send Message俾楊悅盈,我就忍唔住好想再打佢一鑊。

但係而家當務之急係沒收咗佢部電話。

我踎喺佢面前摷佢衫袋同褲袋,但係乜嘢都搵唔到。

啊…

頭先我喺隔離課室打柒佢嗰陣,佢部電話跌咗落枱底。

我轉身諗住行番過隔離課室,但陳佩珊竟然想繼續跟住我。

「我要過番隔離搵啲嘢,你留喺度。」我停咗喺度同佢講。

講完之後我忽然想輕輕捉住佢兩邊膊頭,講啲嘢安慰下佢——唔使驚,我唔會俾你有事——

點知佢一見我伸手,已經好似有啲介意咁,向後縮一縮,不過依然對我點點頭。

無辦法,我惟有頭也不回咁行咗去。

準備出去嗰陣,周Sir同允仔好似士兵搬傷者咁,一左一右扶住梁家豪啱啱好行到課室門外面,梁家豪合埋雙眼,好似瞓著咗咁。

允仔雖然有啲憔悴,但係望落無乜大礙;始終係運動員,佢意志力原來無我頭先諗得咁差。

我讓開俾佢同周Sir入嚟,擦身而過嗰陣輕輕拍咗一拍允仔膊頭,然後就行出走廊轉左過番我哋課室。

我透過我哋課室嗰排染滿血嘅玻璃窗望入去,隱約見到仲有男同學抱起咗個女同學行緊出嚟;課室門無閂,我直接走入去,地上面啲血而家係半乾涸狀態,踩上去個感覺黏住黏住咁,加上嗰陣撲鼻而來嘅腥味,令到我有少少想嘔。

望清楚原來係謝石俊抱住Karman;謝石俊見到我,似乎刻意想避開我眼神——佢頭先係其中一個搖擺不定,想Send Message俾羅彥輝嘅人。

「何晞賢…?呢度無人喇…」唔知係因為抱住個女仔定係點樣,佢把聲有啲虛弱:「周Sir叫我哋全部過晒隔離課室。」

「我知,我過嚟執番啲嘢。」

望住謝石俊出咗去之後,我就想去搵柯志恒部電話,但係呢個時候先發現原來我連自己嗰部都漏咗喺枱面無拎。

我行番過去望一望自己部電話,Mon上面個鐘顯示而家已經18:57。

 

未接來電

6A-楊悅盈 (4)

 

Facebook Messenger

Yuna Yeung has sent you a message!

 

睇嚟楊悅盈無事,於是我暫時唔睇啲Message住,行番去頭先我毆打嗰個位,果然佢部電話仍然喺隔離一張枱個枱底度;我執起佢部機,用自己件校服衫尾抹一抹個Mon上面啲血,就坐番喺自己位想開佢部機嚟睇,但係發覺有Password鎖住咗。

——無所謂,只要唔好俾佢再用到部電話就得。

我將佢部機放喺枱面,然後Unlock咗自己嗰部;除咗四個未接來電之外,楊悅盈仲Send咗幾個Facebook Message俾我。

 

Yuna Yeung:

而家我哋班咩情況?

你有無事?                 18:28

 

Yuna Yeung:

羅彥輝已經死咗,雖然我唔知佢點死

同埋佢媽媽…精神好似有啲失常           18:43

 

Yuna Yeung:

我而家番嚟                  18:45

 

我唔係好想打字,所以諗住打電話俾佢,但係呢個時候我聽到門外面傳嚟一陣作嘔聲;我望出去,見到個女仔彎住腰,一手撐住門框,另一隻手揞住個口,好似就嚟嘔咁款。

第一眼望嗰陣我唔認得佢,因為佢耷低咗頭,啲頭髮遮住咗個樣。

佢抖順條氣之後撥番好啲頭髮,我先見到原來係楊悅盈嚟,佢頭髮有啲亂,呼吸急促,唔知係咪啱啱跑住趕番嚟。見到我坐喺度唔郁,佢本身揞住口鼻想行入嚟。

但係佢望一望地下滿地血漬,又止咗步;我到呢個時候先留意到,唔知點解佢無著鞋。

我將兩個電話袋埋之後起身行出去,見到一身鮮紅嘅我行出嚟,楊悅盈馬上向後縮咗一下。

「…幾多個?」佢唔太想望入課室,擰開面之後問我。

我最初未意識到佢想問乜,隔咗一陣先明;我望番入課室度,周Sir佢哋完全無掂過死咗嘅同學,所以我數咗一下。

「10個。」

「其他人…走晒?」

我指一指5B班課室,然後楊悅盈想行過去;我舉起手制止咗佢。

「俾我行先…」

啲同學啱啱先喺Billy個電話度聽到楊悅盈把聲,如果佢貿然走入去,我唔知佢哋會有咩反應。

「你跟喺我後面,唔好講嘢。」

留言

    未有留言

分享