已讀不回死全家!

第15章 - 15 Unread Messages

羅彥輝間房個佈局同平時(楊悅盈自行想像嘅平時;始終佢只係第一次上嚟)無乜分別:一張好窄嘅床,床尾係衣櫃,床邊有張書枱仔,羅彥輝用電腦嗰陣應該要坐喺床度,因為已經無位再放一張櫈;只不過羅彥輝唔喺房入面。

「咦!輝仔可能同頭先個同學落咗街。」羅太話。

楊悅盈嚇到成個人彈咗一下:羅太唔知幾時走咗去自己後面。

「啊…呃…咁…」

佢口窒窒嘅同時,羅太忽然一手捉住咗佢。

「唔緊要啦,我哋食住等;輝仔知道幾點開飯。」

羅太嘅握力同佢瘦削嘅外型好唔Match,雖然無整痛楊悅盈隻手,但係佢再次嚇咗一嚇,惟有乖乖地番過去飯枱度坐低。

見佢坐低之後,羅太終於放開咗佢,將一碗奶白色、有少少黃油浮面嘅湯推到佢面前。

但係羅太無行開。

一直就企喺佢隔離。

「試下味,我哋平時食得好淡,健康啲吖嘛。」羅太臉上依然掛住同一個笑容,但喺楊悅盈眼中呢個笑容開始變得有啲詭異。

佢知道避無可避,惟有頂硬上呷咗一啖湯——

「Auntie,好好飲,係咪魚湯嚟?」呢句說話係發自真心——啲湯飲落似乎係正常,味道仲要唔錯。

不過羅太就越望越覺得有啲唔對路,所以楊悅盈唔敢再飲啲湯。

「係呀。」羅太好開心咁摸摸楊悅盈個頭。

「Auntie不如你…打個電話俾輝仔啦…唔係啲湯凍咗唔好飲。」

「佢電話無拎出街,不過佢一陣識番嚟架喇。」羅太拎起筷子,夾起咗啲菜放入楊悅盈隻碗度:「試下吖。」

楊悅盈企番起身:生得唔高嘅佢比羅太高少少,兩個人都企喺度會令到佢覺得有番少少安全感。

「我未洗手呀…我想去洗下手先…」楊悅盈講完就急急腳走過去露台嗰邊,羅太慢慢行過嚟跟住佢。

忍唔住擰轉頭望嘅同時,佢眼角就瞄到個神位。

神位除咗關二哥之外,原來仲供奉住一張相——雖然半年無見過面,但係相中人好明顯就係羅彥輝。

楊悅盈不能自制咁覺得背脊毛管戙,佢出咗露台之後就入廁所閂埋門。

鎖埋門。

「阿盈呀…輝仔佢真係成日提起你架…」羅太把聲喺門後面傳過嚟。

楊悅盈開咗電話盞燈。

廁所得一個鋪滿塵嘅燈膽,頭先趕住入嚟無開到,而個掣喺外面;度灰色鐵門側邊有啲生鏽,中間有啲位都開始油漆剝落;馬桶係最普通嗰種白色配一個黑色廁板,佈滿晒啡黃紅嘅鐵鏽污蹟。

成個環境令到楊悅盈覺得好不安。

「佢喺學校俾人蝦…又係你幫佢同老師講…多謝你照顧佢…」羅太繼續講,然後開始有氣無力咁笑出聲。

 

*****

 

雖然羅太無嘗試開門入嚟,甚至乎無任何舉動,淨係喺度笑,但係楊悅盈都用一隻手好用力咁頂住道門;心跳越嚟越快,呼吸變到又急又重。

「Auntie!你嚇親我!」楊悅盈對住門外面嘅羅太講:「不如你去幫我裝飯先,唔該…我好快出嚟!」

「阿盈…」

「啊?」

「你未飲完啲湯。」

「呃…我…我想攤凍啲先,可唔可以俾多隻碗我食住飯先?」

「好啦,咁你快手啲。」羅太把聲開始越嚟越遠:「啲湯凍咗無益…」

外面靜咗落嚟,但係楊悅盈喺廁所入面仍然不斷喘氣,全身已經因為冷汗而濕晒,眼鏡因為水氣濛咗;佢除咗個眼鏡,用電話照住搵到廁紙筒,撕咗幾格出嚟抹乾個眼鏡同埋面上啲汗。

大約等多30秒左右,楊悅盈先敢開鎖,再慢慢推開道門,喺條門罅度望出去。

差唔多六點半,天色開始變黑;成個客廳惟一嘅光源就係神位啲紅燈,楊悅盈見到羅太背對住自己,坐咗喺飯枱度,

「輝仔…阿盈係好女仔嚟…」佢仍然不斷咁講緊嘢:「難得人哋上嚟探你,你番嚟食餐飯啦…」

楊悅盈閂番埋道門,深呼吸咗幾啖想冷靜落嚟,嘗試諗其他嘢令自己分心——

剩餘人數28人…Quit Group死亡人數11人…即係有一個人喺遊戲開始前已經死咗…

佢用力咁搖搖頭,唔想再諗任何關於已讀不回死全家、關於羅彥輝嘅事。

「呼…」合埋對眼,慢慢吐出呢啖氣,先至覺得心跳慢慢恢復正常。

自從呢件事開始——唔係,其實由好耐之前開始,楊悅盈已經知道面對問題嗰陣要壓抑自己嘅感情:恐懼、傷心、絕望。

「呼…」呢啲負面情緒只會影響自己嘅判斷,對客觀情況完全無幫助。

「呼…」問題一日未解決,都唔可以俾負面情緒影響到自己。

佢打開門,克制住想再望向個神位嘅衝動,扮到好似若無其事咁行出廳,坐番喺頭先個位度;面前除咗碗湯之外,仲多咗一碗冒住蒸汽嘅白飯。

羅太溫柔咁對住佢一笑,喺飯枱個紙巾盒度掹咗兩三張紙巾出嚟,伸手過去——楊悅盈本能想縮開,但係忍住咗——羅太伸手過去用紙巾抹佢個額頭。

「嘩…成頭濕晒,不如Auntie開冷氣俾你啦。」

羅太轉身喺電視櫃度拎咗個搖控出嚟,「咇」一聲,裝喺飯枱上面嘅冷氣機就吹咗一陣凍風出嚟,本身已經有啲寒嘅楊悅盈幾乎想打冷震,但係又唔敢叫羅太熄番個冷氣。

直覺話俾自己聽羅太無攻擊性,但係仍然唔想刺激到羅太。

「啲餸好易凍呀,你快啲食啦…」羅太自己拎起碗飯,爬咗兩啖之後又對楊悅盈講:「一陣輝仔番嚟我再幫佢整番熱啲餸,我哋食先啦。」

「阿輝…」楊悅盈隨口講咗個藉口:「阿輝啱啱Whatsapp我話佢唔記得帶電話…佢電話係咪喺房?」

講完出口之後佢覺得呢句說話有啲唔妥,但係羅太無發現到。

「哦,係呀,喺佢櫃筒度。」

「好,不如我拎個電話落去俾佢,你咪可以打電話叫佢番嚟囉。」楊悅盈有啲擔心,唔知羅太會咩反應:「然後我哋就可以三個人一齊食飯。」

「好喎,阿盈叻女,抵得輝仔咁鍾意你…」羅太咧嘴一笑,又伸手過去摸摸楊悅盈個頭。

楊悅盈馬上放低碗,急步走咗入羅彥輝間房度,閂埋門之後喺佢張床度坐低咗;第時如果諗番起頭先同羅太啲對話,佢覺得自己應該會笑到收唔到聲。

打開書枱櫃筒,果然見到一部裂咗Mon,好殘嘅iPhone5S。多手襟咗幾下個Home制,但係個Mon無著到。

——好,喺度坐一坐,然後出番去話拎電話落街,就可以乘機走。

楊悅盈打緊呢個如意算盤嗰陣,佢自己個電話又震咗一下:收到何晞賢Facebook Message。

 

Hei Yin Ho:

佢哋想全班人一齊Send Whatsapp俾你同羅彥輝!           18:22

 

——吓?

楊悅盈即刻放低自己個電話,拎起羅彥輝部機長襟Power,好快個Mon就出現咗Apple Logo。

然後就好似輕咗機咁,一直淨係顯示住個Logo。

 

Hei Yin Ho:

你仲喺唔喺佢屋企?

快啲叫佢喺已讀不回死全家個Group度講佢唔係Admin!               18:23

 

——頂!差唔多成分鐘之後個Logo先消失顯示個Lock Screen出嚟;楊悅盈手忙腳亂咁即刻Unlock部電話好在無密碼同後開咗個Whatsapp打開佢Contact List隨手唔小心襟錯咗第一個Contact Billy Ng (5A班)。

楊悅盈想退番出去嗰陣,見到Billy Ng (5A班)輸入中…

趕唔切打字,佢襟住右下角個Mic掣,對住部電話大叫——

 

「千祈唔好Send Message過嚟!」           18:24

 

Billy Ng (5A班)輸入中…呢句嘢消失咗,但係楊悅盈再補多一句——

 

「羅彥輝…羅彥輝死咗喇!唔好Send嘢去佢Whatsapp度呀!」               18:24

 

情急之間,佢無意識到自己頭先原來係好大聲咁講出嚟…

房門打開咗,微弱嘅紅光照到羅太半邊面,楊悅盈見到佢皺實眉頭望住自己。

「點解呀…點解你哋兩個都話輝仔死咗…」羅太又慢慢行過嚟楊悅盈度,對住佢伸出雙手——

楊悅盈右手拎番自己個電話,撞開咗羅太之後衝向門口拉開鐵閘;佢聽到後面有啲雜物跌落地嘅聲,唔知係羅太俾佢推跌撞冧嘢,定還是羅太追緊過嚟。

而家無時間回頭望!

佢連鞋都無著,鐵閘都無閂,就衝向後樓梯走落樓。

手上面嘅電話不斷咁震、不斷咁響,但係佢只係顧住走落樓,佢要盡快離開呢橦樓。

完全無休息過咁樣跑咗幾層樓梯之後,楊悅盈終於無氣,佢覺得如果再跑落去,自己會窒息;望番上樓梯——羅太似乎無追出嚟。

雖然心理上鬆一口氣,但係佢呼吸快到好似哮喘咁、心跳強烈到連耳仔都聽到碰碰碰、側腹入面隱隱作痛,惟有扶住條欄杆,喺樓梯度坐低咗。

佢用手背抹下面上面啲汗,呢個時候先發覺原來左手一直都渣實羅彥輝個電話無放過手;電話仍然停留喺Billy Ng (5A班)呢個Whatsapp Chat Box度。

 

柒輝你係唔係Admin?

唔係就唔好潛水          18:25

 

楊悅盈知道佢一直懷疑係關鍵人物嘅吳啟鋒已經死咗,但係完全無半點開心或者興奮。

去番上一頁,個List度多咗好多個同班同學Send過嚟嘅Whatsapp;楊悅盈想向下拉數下有幾多個嗰陣,覺得鼻頭一酸,視線忽然間模糊咗。

將自己同羅彥輝個電話疊起放喺梯級上面之後,除咗個眼鏡,用手抹走自己面上嘅汗水。

楊悅盈同自己講,呢啲並唔係眼淚嚟——

拎番起自己個電話,打開Facebook Messenger。

 

Yuna Yeung:

而家我哋班咩情況?

你有無事?                 18:28

 

——問題一日未解決,都唔可以俾負面情緒影響到自己。

但係而家實在好需要休息一下。

手一垂,由得個電話跌落梯級度。

就咁坐喺梯級度,抱住自己膝頭,合埋雙眼。

楊悅盈決定俾十五分鐘時間自己,無論係汗水又好、眼淚又好,流乾之後再繼續面對眼前嘅問題。

留言

    未有留言

分享