已讀不回死全家!

第14章 - 14 Unread Messages

楊悅盈按周Sir寫低嘅地址嚟到禾輋邨。

雖然離自己屋企只係好短嘅路程,但係楊悅盈好少過嚟呢邊。

同自己住嘅瀝源唔同,禾輋邨啲樓係井型,中間有一個天井;楊悅盈喺天井正中間望上去,覺得自己真係好似由個井口望住個天咁,令到佢諗起「井底之蛙」呢四個字。

見到有個女人拖住個細路向住大廈大門行,佢即刻加快腳步跟上去,等佢哋打開咗鐵閘之後再施施然咁一齊入去,經過管理處嗰陣仲對住看更阿伯點頭微笑,看更只係望咗一眼就無理佢。

楊悅盈知道,雖然呢啲屋邨有看更,但係只要佢行入去嗰陣光明正大唔好鬼祟,加上因為自己只係一個著住校服嘅中學生,看更一般都唔會阻止佢。

楊悅盈等電梯嗰陣開始有啲緊張:其實自從羅彥輝退學之後,佢哋雖然好間唔中咁會Whatsapp傾計,一句起兩句止,但係已經半年無見過面。羅彥輝個零月之前有Whatsapp搵過楊悅盈想約佢出嚟見面,但係當時暑假啱啱開始,楊悅盈跟咗屋企人上大陸番鄉下探幾個親戚,佢足足有幾日上唔到網。

電梯到咗,楊悅盈行入去,襟咗層數之後閂門,然後感覺到腳下有一道推力,部電梯開始向上升。

望一望電話,一格都收唔到;佢心入面苦笑咗一下:如果呢個時候部電梯有咩問題,佢就必死無疑。

當時番到香港之後,楊悅盈先見到羅彥輝啲Message;佢嘗試過再約番羅彥輝,但係對方熄咗Last Seen,一直無覆。

電梯門打開,佢望住牆上面嘅指示,行到去羅彥輝住緊嗰個單位嘅門口,襟咗一下門鐘,同時個心都猛烈咁跳咗一下。

屋入面傳嚟一陣緩慢嘅腳步聲,由遠至近,然後打開咗道木門。

開門嘅人係一個中年女人,短頭髮瘦瘦削削,一睇就知係羅彥輝媽媽;羅太上下打量咗一下楊悅盈,見到佢件校服之後就對住楊悅盈露出一個笑容。

「Auntie,我叫楊悅盈,係羅彥輝…阿輝啲同學。」楊悅盈見羅太好似幾友善,當堂放心咗好多:「阿輝喺唔喺屋企?我嚟…我嚟探佢。」

「喺呀,但係輝仔仲未瞓醒,你入嚟坐下先。」羅太拉開咗度鐵閘,楊悅盈一行入屋就聞到陣香味。

「我煮緊飯,你坐下先!」羅太拉番埋度鐵閘就走咗入廚房;楊悅盈除咗鞋,小心翼翼咁穿過滿屋雜物,走去梳化度坐低咗。

呢個單位好細,有兩間房之中其中一間好明顯係羅家自己裝修,喺個廳度間出嚟,幅牆最頂同天花之間漏空咗,等房入面啲冷氣可以出到嚟;楊悅盈直覺覺得呢間就係羅彥輝間房。

佢坐喺梳化上面望住呢間房,透過上面個空位可以見到入面無開燈;羅彥輝仲瞓緊覺?

楊悅盈坐喺度四圍望,間屋除咗放咗好多雜物,啲傢私全部都係一望就知已經用咗好多年;近露台嗰邊放咗個神位,神位上面嘅紅燈照住裏面個尊關二哥。楊悅盈屋企都有個類似嘅神位,嗰種紅燈硬係俾人一種好陰森嘅感覺,搞到佢細個嗰陣成日都唔敢夜晚去廁所。

等到廚房開始傳嚟「沙沙」聲嘅炒餸聲,楊悅盈就企咗起身,踮起腳尖慢慢走過去。

唔理羅彥輝係唔係真係瞓緊,佢只係想偷偷地過去打開門裝下間房:如果羅彥輝真係Admin,一定唔多唔少會有啲蛛絲馬跡。

忽然間佢裙袋入面嘅電話震咗一下;嚇到佢即刻企喺原地唔敢郁。

然後又震一下。

雖然羅太唔會聽到佢部電話震,但係有少少作賊心虛嘅佢只好坐番喺梳化度拎部機出嚟睇。

已讀不回死全家個Group入面收到Admin嘅Message,通知佢哋規則修改。

 

  1. 收到同班同學Whatsapp Message,必需在30分鐘內閱讀及回覆。 16:37

 

楊悅盈完全無任何驚訝或者Hard Feeling,因為佢一早就預計到會有呢一步;由第一日Admin追加規則開始,成個「遊戲」方向已經好清晰:達唔到勝利條件,所有保命方法都只係一個笑話。

佢打開咗電話App,喺Contact List搵咗羅彥輝個手提號碼打過去。

「嘟…嘟…」打唔通。

就喺楊悅盈收線嗰陣,發現吳啟鋒Send咗個Message。

 

大家唔使驚,而家全班同學一齊番學校,六點正課室集合

呢場鬧劇好快就會結束                  16:45

 

——明明你自己先係關鍵人物,點解講到自己好似救世主咁?楊悅盈心入面好不屑吳啟鋒呢個舉動,你諗住叫晒全班番嚟然後你切腹自殺?

「阿盈?你食咗飯未呀?」羅太忽然間喺廚房度問:「我煲落咗湯呀,你唔介意一陣留低食吖;輝仔成日提起你架。」

「好,多謝Auntie。」楊悅盈無打算過要應吳啟鋒所講番去,更何況佢仲未見到羅彥輝,睇怕都唔會咁快離開住。

然後電話又震一下,佢以為Whatsapp又收到Message嗰陣,一望先知原來係何晞賢用Facebook Messenger搵佢。

 

Hei Yin Ho:

Billy而家叫人番學校,佢已經認定咗羅彥輝同埋你就係Admin同喺班入面嘅內鬼

我唔知佢一陣會做啲乜嘢…但係你一陣自己小心            16:47

 

楊悅盈開始有啲嬲,合埋咗雙眼用力吐出一啖氣…

算…

因為佢其實心入面都覺得羅彥輝好有可能就係Admin。

之所以上嚟就係想睇下有無勝利條件以外嘅方法可以結束咗呢件事,或者至少幫大家爭取多啲時間、大啲嘅生存機會。

 

*****

 

羅太由廚房行番出嚟,打開咗張四四方方嘅摺枱,個廳即刻無咗差唔多一半空間。

「阿盈…可唔可以幫我搵啲報紙鋪下張枱。」羅太指一指擺滿成個電視櫃嘅免費報紙:「我去攞啲湯出嚟先。」

楊悅盈拎咗一份釘裝好嘅免費報紙,用力將啲內頁一張一張撕出嚟鋪上枱面,然後羅太就將碗筷——三份碗筷放咗喺張枱度。

「得一餸一湯咋,平時得我同輝仔兩個人食…你唔好介意。」羅太一路拎餸出嚟一路同楊悅盈講。

「呀,我OK架喇!」楊悅盈見個湯煲有啲重,所以入咗廚房幫羅太拎出嚟放喺枱上面。

「你坐吖,舀湯飲住先,我去叫醒輝仔。」

「唔使,等我去叫,俾個驚喜佢吖嘛。」楊悅盈拍一拍羅太膊頭,就走咗去羅彥輝房門口;羅太微微笑望咗佢一眼,然後就開始分派啲碗筷同埋舀湯。

楊悅盈伸手扭咗一下個門把,然後好似拆禮物咁閉住氣,慢慢打開度房——呢個時候,佢電話又震咗一下。

 

Hei Yin Ho:

番到嚟未呀?Billy就嚟開始喇!           17:58

 

——妖!佢有啲不耐煩,暫時亦都唔想同何晞賢解釋咁多住。

 

Yuna Yeung:

番唔到;我喺羅彥輝屋企              18:00

 

將個電話放番入裙袋之後佢就推開咗度房門。

佢幻想過無數次,可能會見到羅彥輝成個Hacker咁對住幾十個Mon同啲同學Whatsapp緊、可能會見到佢整緊啲唔知咩邪門降頭嘢、可能會見到佢用緊粉筆劃啲唔知乜嘢黑魔法陣、可能會見到佢正正常常喺度玩電腦睇漫畫、可能會見到佢真係喺度瞓緊覺、可能…可能會發現佢原來已經自殺死咗好耐無人發現。

所以,當楊悅盈發現間房空無一人嗰陣,佢一時間反應唔切——

留言

    未有留言

分享