已讀不回死全家!

第13章 - 13 Unread Messages

同第一日嗰陣一樣,我同允仔同坐咗喺課室第一排正中,Billy企咗喺老師枱度。

我哋五點半左右就番到嚟,當時得陳佩珊同柯志恒喺課室;如果係平時我可能會心如鹿撞,然後Billy同允仔就會不斷叫我過去聊佢傾計。

但係而家我哋三個都無咁嘅心情。

其他同學開始陸續番到嚟,有啲會帶住懷疑眼光望向Billy,有啲就好似重獲新生咁輕鬆。我每見到一個同學走入課室,就會不其然變得越嚟越緊張。

到六點,差唔多所有仍然生還緊嘅6A班同學都已經番齊,惟獨是MK五人眾同埋楊悅盈唔喺度。

Billy望一望鐘,開始準備發言。

我忍唔住再Send多次Facebook Message俾楊悅盈。

 

Hei Yin Ho:

番到嚟未呀?Billy就嚟開始喇!           17:58

 

「臨時臨急Call大家番嚟唔好意思,但係相信無人未睇頭先Admin個Message。」Billy舉起自己個電話示意。

「我已經查出咗邊個係Admin、同埋佢安插喺我哋之間嘅內鬼,證據確鑿。」

 

Yuna Yeung:

番唔到;我喺羅彥輝屋企              18:00

 

「半年前,我同幾個同學犯咗個錯:我哋對羅彥輝開咗個玩笑,然後佢就申請咗休學;半年之後就發生咗呢件事。你哋可以睇番Admin啲Message,所謂乜撚嘢關鍵人物其實就係指我同埋當日有份嘅三個人。」

Billy講完呢句之後,啲同學開始細細聲喺度傾計,議論紛紛。

「咁樣算係乜嘢證據?」我細細聲問,但係只得Billy、允仔同埋附近一兩個同學聽到,無人打算理我。

「當然大家信唔信,係你哋嘅自由。」Billy講最後一句嗰時,明顯係衝住我而嚟。

「你意思係,羅彥輝係Admin?」柯志恒問;我擰轉頭一望,佢今日依然係坐咗喺靠走廊嗰排單獨位最前嗰度。

Billy點點頭;同學之間亦都有好多人跟住微微點頭,睇嚟懷疑過羅彥輝嘅人遠遠唔止我哋幾個。

「英雄所見,咁你頭先講嘅內鬼,就係楊悅盈?」柯志恒再問。

Billy稍為愕然一下,但再一次點頭。

「果然…我一早已經覺得楊悅盈有啲奇怪…」柯志恒以自言自語嘅口吻、全班人都聽到嘅音量講。

聽到佢咁講之後,同學之間開始傾呢件事;始終柯志恒一直係我哋班嘅高材生,本身無懷疑羅彥輝嘅人可能會開始漸起疑竇,而有懷疑嘅人更加可能會因此而覺得自己嘅諗法俾柯志恒「證實咗」。

而家咁樣真係好大鑊;我深信除咗我之外,班上面應該仲有同學覺得楊悅盈唔係內鬼,但係可能只係得好少數。

「所以我知道,只要我哋引到羅彥輝出嚟或者捉住佢,已讀不回死全家呢壇鬧劇就會結束!」Billy雙手握緊拳頭,啲手指關節啪啪作響。

同學聽到Billy咁講,馬上爆發出一陣歡呼聲,好似已經完全解決咗件事一樣,我仲見到有兩個女同學喊咗出嚟。

「有無人知道羅彥輝屋企喺邊?我哋而家就上去搵佢!」Billy露出一個勝利者嘅微笑,提高音量問。

「無…」

「唔知喎…」

起哄聲入面傳嚟幾下零星嘅回答,無人知道羅彥輝住邊度——我好想話俾Billy聽楊悅盈唔單止知,佢仲已經去緊羅彥輝屋企——但係如果我呢個Moment講,盞加強大家覺得楊悅盈係內鬼嘅印象。

我信唔過楊悅盈,係因為覺得佢會用盡一切方法嘗試搵出同埋殺死關鍵人物;一個咁執著於達到勝利條件嘅人,有乜可能係內鬼?

「一係Send Whatsapp問楊悅盈?」平時最鍾意搞爛Gag嘅賴智勇問。

我拍枱企咗起身,轉過去對住全班(除咗Billy以外)同學。

「不讀不回呢個方法已經廢咗,而家一Send Whatsapp俾同班同學,就等於用刀降住佢哋條頸!」我忍唔住大聲對住賴智勇講:「如果佢哋因為咁樣死咗,Send Message嗰個就等如殺人兇手!」

雖然賴智勇面上個凍結咗嘅笑容,顯示佢頭先只係搞緊爛Gag。

「仲有,我希望大家記住不讀不回呢個方法係邊個諗出嚟!」俾我咁樣一嘈,本身起哄緊嘅6A班好似俾人用搖控控制咁樣瞬間Mute咗:「我哋成日無人死過,好大原因係因為佢;內鬼會咁做?」

大部份人無理我,繼續起哄。

「佢教完我哋不讀不回之後條橋一日就俾Admin Ban咗…有無咁啱得咁橋…」一個男同學反駁我。

「屌…不讀不回我都有考慮過啦…」另一個男同學有啲得戚咁講。

「你有考慮過咁你有無自己身先士卒試過呀!有無番嚟同晒全班講呀仆街!」我指住佢嚟鬧;唔知點解越講越火,對住一班盲目指證、盲目跟風嘅人,我Feel到自己開始頭腦發熱,無乜耐性。

「唔怪得之佢成日咁夠膽同Admin喺個Group度講嘢啦…」又聽到一把女同學聲講:「原來夾埋嘅…」

我喺呢班嘈嘈閉閉唔識諗嘢而又俾Billy同柯志恒輕易咁煽動到嘅白痴入面搵,見到我想搵嗰個人之後我指住佢。

「鄧鐵雄!你有幫過楊悅盈手,你話佢係唔係內鬼?」我好自私咁想拉埋鄧鐵雄過我呢邊,完全無諗過可能連佢,甚至我都會因此被人打做內鬼。

「我唔想架…佢…佢前日話有個方法可以令到我同佢生存到最後…」同佢一貫作風一樣,鄧鐵雄驚驚青青咁講:「我本身好猶豫…幫唔幫佢…」

鄧鐵雄停咗落嚟,用一個求饒咁嘅眼神周圍望,但當佢發現大半班人都回咗頭過嚟對住佢嗰陣,佢驚到即刻耷番低個頭。

「但係佢連自己部電話都俾埋我…叫我用佢個Whatsapp嚟Send Message俾吳啟鋒…」

「自己部電話俾埋——」

「佢連自己部電話都俾埋你?」Billy打斷咗我個問題(雖然我哋問嘅係同一樣嘢):「前日Whatsapp我嗰個係你?」

鄧鐵雄點頭。

「佢連自己部電話都可以俾人…你唔會覺得有詐咩?」柯志恒唔知幾時都企埋起身,追問鄧鐵雄。

「屌你乜嘢所謂不讀不回,根本就係楊悅盈冒我同鄧鐵雄兩個人生命危險試出嚟!」Billy拍枱大鬧。

「我建議我哋而全班一齊Whatsapp羅彥輝同楊悅盈。」柯志恒建議:「我明白有啲人會擔心自己會唔會因為咁而變咗殺人兇手…」佢微微一笑望向我。

——痴撚線!全班人一齊Whatsapp佢兩個?

「…但係我哋咁樣做,如果佢哋係Admin嘅話,就唔會有事。」柯志恒開始離開自己個位,慢慢行出去老師枱度:「就算佢哋唔係Admin,只要兩個人輪流將自己部電話交俾另外嗰個,由一個人用兩部電話互Send Message;鄧鐵雄用楊悅盈電話嚟Whatsapp呢件事已經證明咗,俾其他人操作自己部電話唔會死。」

不知不覺間,柯志恒已經行到去Billy身邊好似助手咁企咗喺度發言——唔係,其實個氣氛,係Billy似佢助手多啲。

 

Hei Yin Ho:

佢哋想全班人一齊Send Whatsapp俾你同羅彥輝!           18:22

 

唔理得咁多,雖然可能俾允仔見到,我仍然照開咗個Facebook Messenger通知楊悅盈。

「如果羅彥輝同楊悅盈身無屎,咁樣做雖然會麻煩到佢哋,但係佢兩個一個休咗學、一個咁多可疑舉動,就當係小懲大戒啦!」

平時秒回嘅楊悅盈無覆我,連Read都未Read。

柯志恒講完之後,對住全班微微一笑,然後不忘向住Billy補一句:「啱唔啱呀,班會主席?」

全班考第一嘅高材生竟然詢問自己意見,Billy嘅表情有少少飄飄然,佢拎咗部電話出嚟,襟咗幾下。

「好,咁我哋就由羅彥輝開始!」Billy似乎打開咗個Whatsapp,我見佢開始打字:「越多人加入,就越有效,用Message轟炸佢哋!」

 

Hei Yin Ho:

你仲喺唔喺佢屋企?

快啲叫佢喺已讀不回死全家個Group度講佢唔係Admin!               18:23

 

只係片面之詞,不過喺呢個時候,惟有希望咁樣可以拖延到少少時間;Billy講完之後,鄧鐵雄同埋另外起碼四五個同學即刻響應,其他唔少人都好似躍躍欲試;喺我身邊嘅允仔亦都拎起咗電話。

我捉住佢隻手,用懇求嘅眼光望住對佢搖搖頭。

「嘩屌!」Billy唔知俾乜嘢嚇親,大叫咗一聲:「靜一靜先…靜一靜先!羅彥輝Whatsapp Send咗個語音訊息俾我!」

Billy開咗Speaker播個Audio Note。

 

「千祈唔好Send Message過嚟!」

 

聽到之後。

全班同學都呆撚咗。

因為段Audio Note把聲係楊悅盈嚟。

我雖然唔知點解楊悅盈要咁做(嚴格嚟講,我連佢點樣做到都唔知),但係我見允仔分咗心,就趁呢個機會搶走咗佢部電話。

「仆街,仲唔撚露出馬腳…」Billy好似執到寶咁,大大聲講咗句:「Admin柒輝同楊悅盈去死啦!」

然後佢就好快咁打咗句嘢Send出去。

聽完楊悅盈個Audio Note之後,我見到差唔多半班人都開始拎住部電話打緊Whatsapp——連陳佩珊都係——

我左手仍然拎住允仔部電話,彈起身衝過去嘗試阻止陳佩珊——

但係Send去羅彥輝Whatsapp嘅Message,已經有好多出咗街。

 

柒輝你係唔係Admin?

唔係就唔好潛水          18:25

 

好好玩呀?

而家整個Group扮玩遊戲好好玩?

留喺屋企玩自己老母啦!              18:25

 

羅彥輝死全家             18:25

 

你做緊乜嘢我哋知道晒~

唔好再玩喇~

柒少陣啦~ 18:25

 

弱智仔wwwww

以你智商諗到整個咁嘅遊戲算好勁wwwwwww               18:25

 

屌你老母!楊悅盈係我架

你條仆街毒撚唔好諗住食天鵝肉!                 18:25

 

樣撚衰…

我係你就死咗佢算                18:25

 

哈哈哈

羅同學你做埋啲嘢好有趣呀

雖然無人想理你          18:25

 

我屌你老母羅彥輝!            18:25

 

唔係逼不得已其實我唔想搵你…

收手啦好嘛…              18:25

留言

    未有留言

分享