已讀不回死全家!

第12章 - 12 Unread Messages

啪。

啪。

「喂!」

家姐拍咗我塊面兩下見我無反應,所以大叫一聲,嚇醒我;我捽下隻眼,拎起部電話一望,已經晏晝三點幾,我前一晚通咗宵之後,一瞓就瞓咗差唔多十五個鐘。

「Billy同允仔嚟咗,好似有啲緊要事搵你。」

我高速去廁所刷完牙之後就出咗廳,見到Billy同允仔坐咗喺度:我識咗佢哋咁耐都未見過佢哋個樣咁嚴肅,搞到連我屋企啲空氣都好似好沉重咁。

「啊…你哋食咗嘢未,不如我煮啲嘢俾你哋食?」連我家姐都俾佢哋影響到,平時懶到出汁嘅佢竟然想煮飯俾我食。

「唔使喇,我哋有啲嘢要傾。」

「咁…咁我出街先,我今日約咗人。」

我坐咗喺Billy隔離,直到家姐換完衫出門口之前三個人粒聲都無出過。

家姐臨出門之前好似有啲擔心咁望一望我,但係最後無再講乜嘢,同我哋講咗聲拜拜之後就走咗;我留意到允仔一如以往咁眼定定望住家姐,咁先鬆咗一口氣——允仔始終係允仔,唔會放過任何一個昅何晞媛嘅機會。

「你尋晚同我講嘢嘅我已經話咗俾允仔聽。」率先打破沉默嘅係Billy:「我同佢都覺得,柒輝真係好有可能就係Admin。」

允仔點點頭附和Billy。

「嘅然知道邊個係罪魁禍首,我哋就唔可以當唔知道,再係咁落去,我哋三個、子筠,甚至乎你個陳佩珊都會有危險。」

「而家你都唔肯定係唔係;同埋就算係都好,我哋根本都唔知佢點樣搞已讀不回死全家呢壇嘢出嚟,咁又可以做啲乜?」我反問Billy。

「搵佢出嚟,同佢當面對質。只要捉到主謀,呢個所謂『遊戲』就自不然會停止。」允仔代Billy答,睇嚟佢哋已經事先傾過。

我哋三個雖然係好朋友,但係其實我總有個感覺係Billy比較鍾意我,但係允仔又好崇拜Billy;所以一旦我同Billy有咩分歧嘅話,允仔幾乎鐵定唔會企喺我呢邊。

「仲有,我覺得楊悅盈都好有可疑。」Billy補多一句:「有乜可能全班咁多人得佢一個發現到有個不讀不回嘅方法?」

「呢個方法明明你都有諗過!只不過係我哋唔敢試咋嘛!」我忍唔住開始對住Billy大聲講嘢。

經過咗尋晚,我似乎同楊悅盈嘅諗法喺某程度上同步咗:迴避死亡解決唔到問題,而係應該盡一切努力救番越多人越好。

我有煩惱過點樣將Billy同允仔嘅思路扭向呢個方向;而家睇嚟無咁容易不特止,佢哋仲走咗去一個完全相反嘅方向。

「咁點解佢會夠膽試?佢唔怕死?定還是…」Billy頓咗一頓,望實我,繼續講:「佢知道自己根本就唔會死?」

我感覺到自己開始有少少動搖。

唔通楊悅盈一直以嚟都係扮緊嘢?

佢其實一直都係Admin…一直都係羅同學嘅內應,千方百計想將四個關鍵人物——包括Billy在內嘅欺凌者——置諸死地?

「鳩賢…唔好同我講你完全無諗過柒輝就係Admin。」

Billy呢一句嘢講中咗我內心——我尋晚的確因為呢個問題煩惱咗成晚。

「而且楊悅盈一開始就揀我嚟做測試…你有無諗過佢由頭到尾其實都係整死我?」

「我哋唔係想對羅彥輝或者楊悅盈不利,只係想引佢哋出嚟俾大家一個交待。」允仔望住我講:「就算佢哋係因為乜嘢搞呢壇『遊戲』出嚟,Elaine始終都係因為佢哋而死。」

「鳩賢…我諗住聽日叫齊全班同學一齊番去,無論你支唔支持我,我都會將頭先嗰番話原原本本講同佢哋講。」Billy語重深長咁同我講:「至於最後會點處理,就由全班同學去決定。」

就喺我完全無晒主意嘅時候,忽然間我哋三個個電話一齊響——我好想形容呢下係「救命鈴聲」,但係我心知肚明呢下響聲代表乜嘢。

 

大家好!關懷同學由Whatsapp做起!

讀後回覆是基本禮儀,已讀不回的人都去死吧!

本日因已讀不回而死的人數:0人

因Quit Group而死的人數:0人   

剩餘人數:28人          16:32

 

恭喜大家又再安全渡過一日!

Admin今天提早出來,因為忍不住要跳出來稱讚一下大家!

兩天沒有人因為已讀不回死亡,看來大家都學懂讀後回覆的基本禮儀了!                16:33

 

接下來要教育大家的是:

及時閱讀訊息的重要性!              16:35

 

我見到Admin呢句嘢,就知道我尋晚擔心嘅嘢即將發生;我完全無預計過,咁快就會出現呢件事。

Billy同允仔都同時間意識到Admin想講乜。

「喂…唔撚好呀…」Billy壓低把聲講;允仔連聲都無出,淨係碌大對眼望實個電話Mon。

 

Admin覺得對天資聰穎的6A班同學來說絕對沒有問題的

因此決定修正以下規則,即時生效!            16:36

 

1. 收到同班同學Whatsapp Message,必需在30分鐘內閱讀及回覆。           16:37

 

我覺得有啲無力感,向後挨咗落梳化度。

 

Admin為6A班諸君感到相當自豪!

下面是最新的規則,請大家繼續努力!                  16:37

 

遊戲規則:

1. 收到同班同學Whatsapp Message,必需在30分鐘內讀取及回覆。[修訂規則]

2. Group Message不在此限。

3. 用Emoji或者無意義語句回覆者——死亡!

4. Quit Group者——死亡!

5. Send Message給死者——死亡!

6. 把遊戲的存在以及任何資料告知此Group以外的第三者——該名第三者死亡!

 

勝利條件:

1. 6A班全員死亡!

2. 6A班倖存者兩人或以下!

3. 關鍵人物全員死亡! (進度:1/4)               16:40

 

我哋三個對望一眼,大家都唔知講乜嘢好;但係Billy最快回過神。

「唔使驚,過埋聽日,呢件事就會告一段落。」佢好有自信咁同我哋兩個講。

然後佢就喺個Group度Send咗一句。

 

大家唔使驚,而家全班同學一齊番學校,六點正課室集合

呢場鬧劇好快就會結束                  16:45

 

「鳩賢…換衫番學校…」Send完呢段Message之後,Billy就企咗起身,以近乎命令嘅語氣同我講。

我知道佢打算將茅頭指向楊悅盈同羅彥輝;我唔否認我都有懷疑、唔信任呢兩個人,但係我更加唔想Billy一下子煽動晒全班視佢兩個為公敵。

雖然唔想參與呢次集會,但係我惟有番入房換衫。

我惟一可以做嘅,就係用Facebook Messenger通知楊悅盈。

 

Hei Yin Ho:

Billy而家叫人番學校,佢已經認定咗羅彥輝同埋你就係Admin同喺班入面嘅內鬼

我唔知佢一陣會做啲乜嘢…但係你一陣自己小心            16:47

留言

    未有留言

分享