已讀不回死全家!

第10章 - 10 Unread Messages

當晚我瞓咗喺床,雖然覺得好攰,但係完全瞓唔著,淨係成晚不斷諗起家姐句說話。

我其實都唔鍾意啲蝦蝦霸霸嘅人,但係點解當日我無阻止Billy佢哋?

平時啲同學對佢大大小小嘅整蠱、改花名,羅同學都好似無動於衷;但係更衣室嗰次佢好明顯係想反抗,唔想Billy佢哋咁樣對自己。

我當時視若無睹,都尚且可以話係因為我驚。

但係事後,羅同學番到嚟俾人恥笑、俾人玩,佢其實有向過我求救;因為驚Billy俾人罰或者記缺點,我猶豫咗好耐應唔應該幫羅同學同周Sir講。

到段片喺5A班圍內廣傳咗差唔多一個星期之後,我先至鼓起勇氣,諗住私底下搵周Sir同佢講呢件事,但係當我行到去教員室附近,我就見到楊悅盈同周Sir講緊嘢。

第二日放學,周Sir叫咗羅同學、Billy、徐建文同埋另外兩個有份嘅同學去教員室;事後我問番Billy咩事,佢話周Sir問起更衣室發生咩事,佢同徐建文幾個人雖然死口話係同羅同學玩,但其實當時諗住死梗。

點知羅同學竟然附和佢哋,所以周Sir都無辦法,惟有當係學生之間胡鬧,放咗佢哋走;當然其他同學(尤其是徐建文一眾MK同學)唔會因此而放過羅同學,反而變本加厲,日日都話要再幫羅同學拍多一段。

結果幾日之後,羅同學就無喺學校出現過,而我哋班,尤其是有欺凌過佢嘅同學(佔咗全班80%人)都暗自覺得有啲不安;就算到咗事後知道佢係因為健康理由申請休學,大家都仍然唔係太願意再提起呢個人,久而久之更加好似忘記咗佢咁。

其實我相信除咗楊悅盈之外,已經有唔少同班同學會懷疑半年前羅同學短片事件同已讀不回死全家係有關係,但係大家都唔敢宣之於口,唔敢承認,甚至乎連呢個可能性都唔敢想像。

因為如果兩件事真係有關嘅話,就代表而家呢一切都係我哋嘅自作孽。

突然間擺喺枕頭邊嘅電話響咗一下,嚇到我即刻拎起嚟睇。

Facebook有人Add我——Yuna Yeung…楊悅盈?

為咗達到勝利條件,連同班同學都想殺嗰個楊悅盈?我唔知佢係扮嘢、本身都係咁冷血,定還是已經俾呢個所謂「遊戲」逼到痴撚咗線…

勝利條件…

「我想同大家講,而家諗住保命只係治標不治本。」楊悅盈今日喺課室講過呢句說話,當時包括我在內嘅所有人都好急切想知佢口中嗰個100%保命方法係乜嘢,所以完全無在意過佢呢句說話。

而家我越諗就越覺得心寒,開始知道今日同Billy佢哋行落樓梯嗰陣,點解我硬係覺得有嘢唔妥…

已讀不回死全家個Group開始嘅第一日,已經有新規則追加——係咪即係代表Admin其實隨時可以按佢喜好或者需要去改規則?

同時又諗起另一個問題:第一日究竟係邊個將已讀不回死全家呢件事同咗其他人講?

難得今日有少少放鬆咗嘅頭腦一下子又湧出好多自己完全無頭緒嘅問題…

「我哋應該Focus落去勝利條件度,將三個關鍵人物搵出嚟。」

其實…痴撚咗線嘅可能係我哋、楊悅盈先係最清醒嗰個?

隻手好似唔受控制咁,打開咗個Facebook App,喺Yuna Yeung個Friend Request隔離襟咗「Accept」。

唔使一分鐘,個Facebook Messenger就收到佢Message。

 

Yuna Yeung:

我今日試過打俾羅彥輝,但係打唔通             00:16

我呢一兩日諗住去佢屋企搵佢,你同我一齊去?            00:16

 

Hei Yin Ho:

你唔搵鄧鐵雄陪你?            00:18

 

Yuna Yeung:

我唔係同鄧鐵雄私底下密謀緊乜嘢,只係想盡量救多啲同學

我覺得佢唔會再幫到我手,所以我唔搵佢              00:19

 

Hei Yin Ho:

你意思係覺得我會幫到手?                   00:19

 

Yuna Yeung:

我唔肯定…但係值得一試              00:20

 

雖然我知道搵到羅彥輝之後可能就會了結咗成件事,我亦都好好奇想跟佢一齊去搵羅彥輝。但係…我發現自己原來都係信唔過楊悅盈。

 

Hei Yin Ho:

唔好意思…我聽日有啲事唔得閒           00:21

 

楊悅盈見到我咁講之後,靜咗好耐,我本身以為佢唔會再繼續同我講落去;但係當我閂咗個電話Mon想瞓覺嗰陣,電話又響,收到一個新Message。

 

Yuna Yeung:

其實我諗全班同學,包括你在內

而家除咗已讀不回死全家之外,對其他嘢都唔會再咁上心

所以如果你唔想同我一齊行動

或者對我有啲咩顧忌嘅話,你不妨直接同我講,我唔會介意            00:40

 

我本身已經覺得佢咁直接咁串我,有啲唔係太高興;點知佢仲要補多一句:

 

反正就算你好似而家咁嘗試婉轉敷衍我

我都一樣睇得穿你                00:41

 

「我屌你…」我細細聲鬧咗一句之後,就閂咗個Facebook Messenger。

然後將部電話校番做靜音。

今晚終於可以有覺好瞓…

留言

    未有留言

分享