你有冇見過鬼!?

第20章 - 你有冇見過「地縛靈」?

    事件係我舊公司一位女同事姍姍口述嘅一件見鬼往事。

話說姗姍家底相當唔錯,由內地嚟咗香港定居已經好多年。

 

    佢係雲南人,屋企係做茶葉生意幾個山頭都係種茶葉。

細細個就已經周山走,姍姍話記得當時六七歲同一個採茶葉女工嘅細女年紀差不多,

經常響一級級嘅茶葉田爬上爬落,走嚟走去,玩得好開心。

 

    不過姍姍記得就響要跟屋企人落香港當日收到一個壞消息,係嗰位女工嘅細女由茶葉田跌咗落嚟,

個頭撞到大石流血過多救唔返……

 

    因為當時細路女又唔識追問,自此就慢慢冇將件事放上心。

直到三年前姍姍要返到鄉下雲南祭祖,計劃要逗留四五日。

 

    返到鄉下茶園嘅第二晚,姍姍見天色幾好又有月光就自己一個人出去茶園散步,

行到一級級茶田時,佢發現一個細路女踎低響其中一級田上面,

睇真啲個細路女係朦朦朧朧白色半透明嘅,佢話當時唔知點解唔識驚仲走上前想睇清楚。

 

    姍姍見到嗰個細路女同佢細細個一齊玩嘅小朋友個樣一模一樣,完全冇長大過咁。

佢就想起好多年前茶園發生嗰件意外,更加知道自己見到嘅一定唔係人⋯⋯

 

    姍姍心底一酸再問:「點解你仲響度嘅?」

個小朋友冇出一句聲,雙眼空空洞咁只係望住姗姍流出眼淚,沉默咗一陣就放聲痛哭⋯⋯

而姍姍自己亦莫名其妙咁喊咗出嚟,上前抱住個小朋友不停咁喊⋯⋯一路喊到虛脫不省人事⋯⋯直到天光茶園工人響田邊發現佢。

 

    後來從工人口中先知道原來呢個小朋友鬼魂經常會響茶園出現,所以工人都好少敢夜晚上山。

之後姍姍返到嚟香港都仲係耿耿於懷唔知點樣可以幫到佢嗰位朋友?

 

   但過咗一段時間,姍姍收到嘅消息就係當佢離開雲南之後嗰個小朋友鬼魂就已經冇再出現。

希望嗰位小朋友真係可以得到安息......

 

 

「地縛靈」

 

因死去時有悔恨之意未能解脫,

而能量有限只可活動於某一特定空間。

時間久了他和此空間的能量融為一體, 更加不能逃離這地方。

有如自己製造了一個「結界」。

又像被詛咒似的停留在這空間一百年幾百年甚至上千年⋯⋯

 

留言

    未有留言

分享